Hingoli Crime : दुर्गादेवी विसर्जन मिरवणुकीत दोन गटात राडा; दगडफेक करत लाठ्याकाठ्यांनी मारहाण

 

Hingoli  : नवरात्रोत्स उत्साहात साजरा करण्यात आल्यानंतर दुर्गादेवी विसर्जनाची तयारी सुरु झाली आहे. त्यानुसार हिंगोलीच्या वेलतुरा गावात दुर्गादेवीची विसर्जन मिरवणूक काढण्यात आली होती. या मिरवणुकीत दोन गटात प्रचंड राडा झाला होता. यात काहींनी लाठ्याकाठ्यांनी मारहाण केली. तर दगडफेक देखील करण्यात आली असून यात अनेकजण जखमी झाले आहेत. जखमींना शासकीय रुग्णालयात उपचारासाठी दाखल करण्यात आले आहे.

हिंगोलीच्या वेलतुरा गावात काल रात्री दुर्गादेवीची विसर्जन मिरवणुक काढण्यात आली होती. मिरवणूक सुरु असताना मिरवणुकीत दुर्गादेवी व्यतिरिक्त कोणतेही गाणे लावू नका; असे सांगितल्यावरून वाद निर्माण झाला होता. यातून काही तरुणांनी डीजे आणि बँड पथकातील व्यक्तींना मारहाण करत तोडफोड केल्याचा आरोप मिरवणुकीच्या आयोजकांनी केला आहे. तर गावात आमच्या नेत्यांचे पोस्टर फाडल्याने हा वाद सुरू झाल्याचं दुसऱ्या गटातील लोकांचे म्हणणे आहे.

दोघांची प्रकृती गंभीर

सदरच्या घटनेत आतापर्यंत २० ते २५ जण जखमी झाले आहेत. त्यापैकी दोन जणांची पकृती गंभीर असल्याने त्यांना संभाजीनगरच्या रुग्णालयात उपचारासाठी पाठवण्यात आले आहे. विशेष म्हणजे वाद होण्यापूर्वी दोन्ही समाजातील नागरिकांनी एकमेकांना दुर्गादेवीच्या महाप्रसादामध्ये जेवण करण्यासाठी निमंत्रित केले होते. मात्र संध्याकाळी मिरवणूक सुरू होताच डिजेवर गाणे लावण्याच्या कारणावरून हा वाद उद्भवला आणि प्रचंड दगडफेक झाली आहे.

१२ जणांना घेतले ताब्यात

सध्या वेलतुरा गावात तणावपूर्ण शांतता असून पोलिसांचे दंगा नियंत्रण पथक व वरिष्ठ पोलीस अधिकारी संपूर्ण परिस्थितीवर लक्ष ठेवून आहेत. मात्र पोलीस बंदोबस्तात दुर्गादेवीचे विसर्जन करण्यात आले. दरम्यान पोलिसांनी झालेल्या राड्यात संबंधितांची धरपकड सुरु केली आहे. आता पर्यंत दगडफेक करणाऱ्या दोन्ही गटातील १२ ते १३ जणांना अटक करण्यात आली आहे.