नवी मुंबईत एफडीएची धडक कारवाई: महापे एमआयडीसीत दुध भेसळ रॅकेटचा पर्दाफाश; ४,७१० लिटर भेसळयुक्त दूध नष्ट, १५ जणांवर गुन्हे दाखल

नवी मुंबई: अन्न आणि औषध प्रशासनाचे (FDA) राज्य आयुक्त तुकाराम मुंढे यांच्या आदेशानुसार राज्यभरात भेसळखोरांविरोधात जोरदार मोहीम राबवली जात आहे. याच मोहिमेअंतर्गत नवी मुंबईतील महापे एमआयडीसी (Mahape MIDC) परिसरात सुरू असलेल्या एका अत्यंत मोठ्या आणि धोकादायक दूध भेसळ रॅकेटचा एफडीएच्या पथकाने पर्दाफाश केला आहे. या कारवाईदरम्यान एकूण ४,७१० लिटर भेसळयुक्त आणि संशयित दूध जप्त करून सार्वजनिक आरोग्याच्या सुरक्षेसाठी जागेवरच नष्ट करण्यात आले आहे.

भेसळीची धक्कादायक पद्धत आणि रंगेहाथ कारवाई

गुप्त माहितीच्या आधारे ठाणे एफडीएच्या पथकाने महापे येथील मे. पी. के. डेअरी (Me. P. K. Dairy) वर छापा टाकला. छापा टाकला असता, डेअरीच्या आवारात 'MH 04 KU 1634' क्रमांकाचा आयशर दूध टँकर उभा असल्याचे आढळले.

तपासात उघड झाले की, डेअरी मालक प्रदीप कमलेश यादव याच्या संगनमताने शिवेंद्र श्यामलाल जैस्वाल (वय ३४) हा दुधाची पाकिटे फोडून त्यामध्ये स्किम्ड मिल्क पावडर (SMP) आणि चिलरच्या थंड पाण्याचे मिश्रण टँकरमध्ये ओतत होता. १ किलो स्किम्ड मिल्क पावडरमध्ये तब्बल ८ ते १० लिटर थंड पाणी मिसळून ते प्लंजरच्या साहाय्याने एकजीव केले जात होते. हे बनावट आणि भेसळयुक्त दूध शुद्ध गायी-म्हशीचे दूध असल्याचे भासवून नवी मुंबई, ठाणे, ऐरोली, घणसोली, दिघा आणि कोपरी परिसरातील विविध डेअऱ्यांना विकले जात होते.

१५ व्यक्ती व संस्थांवर एफआयआर (FIR) दाखल

या संपूर्ण प्रकरणाची गंभीर दखल घेत तुर्भे पोलीस ठाण्यात १५ व्यक्ती आणि संबंधित डेअऱ्यांविरुद्ध प्रथम खबर अहवाल (FIR) दाखल करण्यात आला असून परवाने रद्द करण्याची प्रक्रिया सुरू करण्यात आली आहे.

गुन्ह्यात समाविष्ट असणाऱ्या डेअऱ्या व व्यक्ती:

1. शिवेंद्र श्यामलाल जैस्वाल

2. प्रदीप कमलेश यादव (मे. पी. के. डेअरी)

3. भास्कर संतु पिलानी (मे. भास्कर डेअरी, महापे)

4. मे. महाराज डेअरी (ऐरोली)

5. मे. विजय डेअरी (घणसोली)

6. मे. शिवकैलास डेअरी (ऐरोली)

7. मे. रूपसागर डेअरी (ऐरोली)

8. मे. दिनेश डेअरी (ऐरोली)

9. मे. बालाजी डेअरी (ऐरोली)

10. मे. शुक्लम् डेअरी (दिघा)

11. मे. श्रीराम डेअरी (कोपरी, ठाणे)

12. मे. वासुदेव डेअरी (कोपरी, ठाणे)

13. मे. राधाकृष्ण डेअरी (कोपरी, ठाणे)

14. मे. जनम डेअरी (साकेत, ठाणे)

15. मे. देवनारायण डेअरी (आझाद नगर, ब्रह्मांड, ठाणे)

लाखो रुपयांचा साठा जप्त आणि नष्ट

अन्न सुरक्षा परवाना नसल्यामुळे मे. पी. के. डेअरीचा व्यवसाय तात्काळ बंद करण्यात आला. एफडीएने राबवलेल्या संपूर्ण मोहिमेत पुढील साहित्य व साठा जप्त/नष्ट करण्यात आला:

• भेसळयुक्त व संशयित दूध: ४,७१० लिटर (किंमत ₹१,८५,७८०) – नष्ट करण्यात आले.

• स्किम्ड मिल्क पावडर (SMP): ४७३ किलो (किंमत ₹१,६०,८२०) – जप्त.

• पनीर: १२९.५ किलो (किंमत ₹४५,२८०) – जप्त.

• क्रीम: ८८.४ किलो (किंमत ₹३०,९४०) – जप्त.

• इतर साठा: मे. नारायण डेअरी (रबाळे) येथून ३,६४८ लिटर पाश्चराईज्ड स्किम्ड दूध (किंमत ₹१,२४,०३२) नष्ट करण्यात आले.

प्रशासकीय पथक व नागरिकांना आवाहन

ही धडक कारवाई अन्न व औषध प्रशासन आयुक्त तुकाराम मुंढे, दक्षता विभागाच्या सह-आयुक्त प्रीती टिपरे, ठाण्याचे अन्न सह-आयुक्त सचिन जाधव, कोकण विभागाचे सह-आयुक्त अजित मैत्रे आणि अन्न सुरक्षा अधिकारी विक्रम निकम, प्रशांत पवार, उत्तरेश्वर बडे व माणिक जाधव यांच्या पथकाने केली.

एफडीएचे आवाहन: नागरिकांना दुधात किंवा कोणत्याही अन्नपदार्थात भेसळीचा संशय आल्यास प्रशासनाच्या १८०० २२२ ३६५ (1800 222 365) या टोल-फ्री क्रमांकावर तात्काळ तक्रार नोंदवावी.