छत्रपती संभाजीनगर हादरले! बजाज नगरमधील एएस क्लब उड्डाणपुलावरून १८ वर्षीय तरुणीची उडी; दोन्ही पाय फ्रॅक्चर, आत्महत्येचा प्रयत्न

छत्रपती संभाजीनगर / बजाजनगर: छत्रपती संभाजीनगर जवळील बजाजनगर परिसरामध्ये एक अत्यंत धक्कादायक घटना समोर आली आहे. एएस क्लब परिसरातील उड्डाणपुलावरून (Flyover) खाली उडी मारत एका १८ वर्षीय तरिणिने आत्महत्येचा प्रयत्न केल्याची खळबळजनक घटना घडली आहे. या भीषण प्रकारामध्ये सदर तरुणीचे दोन्ही पाय फ्रॅक्चर झाले असून तिच्या चेहरा आणि जबड्याला देखील गंभीर दुखापत झाली आहे. सध्या तिच्यावर शहरातील एका खासगी रुग्णालयात अतिदक्षता विभागात व डॉक्टरांच्या देखरेखीखाली उपचार सुरू आहेत.

काय घडली नेमकी घटना? मिळालेल्या सविस्तर माहितीनुसार, पीडित तरुणी गुरुवारी सकाळी साडेनऊच्या सुमारास घरातील मंडळींना सेतू केंद्रावर जाऊन काही महत्त्वाचा ऑनलाइन फॉर्म भरायचा आहे, असे सांगून घराबाहेर पडली होती. मात्र, काही वेळातच ती सरळ बजाजनगर येथील एएस क्लब जवळील उड्डाणपुलावर जाऊन पोहचली. तिथून तिने अचानक खाली उडी टाकून आपले जीवन संपवण्याचा टोकाचा प्रयत्न केला. सकाळी अकराच्या सुमारास तिच्या बहिणीच्या मुलीकडून कुटुंबीयांना या दुर्दैवी घटनेची माहिती मिळताच त्यांच्या पायाखालची जमीनच सरकली.

पोलिसांची तत्परता आणि मदतकार्य: घटनेची माहिती मिळताच वाहतूक शाखेचे कर्तव्यदक्ष कर्मचारी अशोक थोरात आणि अजित परशूवाले यांनी तातडीने सतर्कता दाखवत ११२ क्रमांकावर संपर्क साधून मदतकार्य सुरू केले. वाळूज एमआयडीसी पोलिसांच्या पथकाने तातडीने घटनास्थळी धाव घेत जखमी तरुणीला तातडीने उपचारासाठी जवळच्या रुग्णालयात दाखल केले.

तरुणीची पार्श्वभूमी आणि पुढील तपास: पोलिसांनी केलेल्या प्राथमिक तपासात असे समोर आले आहे की, या तरुणीने २०२४-२५ या शैक्षणिक सत्रात मिलिंद महाविद्यालयातून आपली बारावीची परीक्षा यशस्वीरीत्या उत्तीर्ण केली होती. तिला पुढे कायद्याचे (Law) उच्च शिक्षण घेण्याची तीव्र इच्छा होती आणि यासाठी तिने शिक्षणात एक वर्षाचा गॅप देखील घेतला होता. मात्र, इतकी हुशार आणि अभ्यासू असणाऱ्या या तरुणीने नेमक्या कोणत्या कारणातून किंवा नैरास्यातून हे टोकाचे पाऊल उचलले, याचे नेमके कारण अद्याप समोर आलेले नाही. वाळूज एमआयडीसी पोलिसांनी या प्रकरणी नोंद करून घेतली असून, आत्महत्येच्या प्रयत्नामागील नेमक्या कारणाचा शोध घेण्यासाठी पोलिसांकडून सखोल तपास सुरू आहे.