पुणे: ‘ब्लड इन नीड’ सेवेचा अखिल भारतीय विस्तार; डॉ. तात्याराव लहाने,सयाजी शिंदे, यांच्या उपस्थितित मोबाइल ॲपचा लोकार्पण सोहळा जगद्गुरू नरेंद्राचार्य

पुणे: देशभरातील गरजू रुग्णांना वेळेत रक्त उपलब्ध करून देण्याच्या उद्देशाने सुरू करण्यात आलेल्या ‘ब्लड इन नीड’ या सामाजिक उपक्रमाचा आता अखिल भारतीय विस्तार करण्यात येत आहे. या विस्ताराचा महत्त्वपूर्ण टप्पा म्हणून विकसित करण्यात आलेल्या ‘ब्लड इन नीड’ मोबाइल ॲपचे लोकार्पण पुण्यात होणार असून या कार्यक्रमात विविध प्रसारमाध्यमांच्या प्रतिनिधींना जगद्गुरू श्रीमद्रामानंदाचार्य नरेंद्राचार्यजी यांच्याशी थेट संवाद साधण्याची विशेष संधी उपलब्ध होणार आहे.

जगद्गुरू श्रीमद्रामानंदाचार्य नरेंद्राचार्यजी यांच्या प्रेरणेतून २ ऑक्टोबर २०११ रोजी ‘ब्लड इन नीड’ या उपक्रमाची सुरुवात झाली. अपघात, शस्त्रक्रिया, प्रसूती, गंभीर आजार किंवा इतर आपत्कालीन परिस्थितीत रक्ताची गरज भासणाऱ्या रुग्णांना योग्य वेळी आणि विनामूल्य रक्त उपलब्ध करून देणे हा या सेवेचा प्रमुख उद्देश आहे. गेल्या अनेक वर्षांपासून कार्यरत असलेल्या या उपक्रमाने हजारो कुटुंबांना मदतीचा हात दिला असून आजपर्यंत २७ हजार ६३८ हून अधिक गरजू रुग्णांना जीवनदायी मदत मिळाली आहे.

रक्तदान क्षेत्रात तंत्रज्ञानाचा प्रभावी वापर करण्याच्या उद्देशाने ‘ब्लड इन नीड’ मोबाइल ॲप विकसित करण्यात आले आहे. या ॲपच्या माध्यमातून देशभरातील रक्तदाते, रक्तपेढ्या, सामाजिक कार्यकर्ते, रक्तमित्र आणि गरजू रुग्ण यांच्यात तातडीने संपर्क साधता येणार आहे. त्यामुळे रक्ताच्या शोधात होणारा विलंब कमी होऊन अनेक रुग्णांचे प्राण वाचविण्यास मदत होणार असल्याचा विश्वास आयोजकांनी व्यक्त केला आहे.

गेली ३४ वर्षे जगद्गुरू नरेंद्राचार्यजी ‘तुम्ही जगा, दुसऱ्याला जगवा’ या मानवतावादी विचाराने विविध समाजोपयोगी उपक्रम राबवत आहेत. रक्तदानाबरोबरच अवयवदान, देहदान, विनामूल्य रुग्णवाहिका सेवा, व्यसनमुक्ती अभियान, शिक्षण, पर्यावरण संवर्धन, जलसंधारण आणि विविध सामाजिक क्षेत्रांमध्ये त्यांनी केलेले कार्य देशभरात आदर्श मानले जाते. या उपक्रमांमुळे समाजसेवेच्या क्षेत्रात एक व्यापक चळवळ उभी राहिली असून लाखो लोक त्यामध्ये सहभागी झाले आहेत.

या विशेष कार्यक्रमादरम्यान माध्यम प्रतिनिधींना ‘ब्लड इन नीड’च्या राष्ट्रीय विस्ताराबाबत सविस्तर माहिती दिली जाणार आहे. तसेच आधुनिक तंत्रज्ञानाचा समाजसेवेसाठी कसा उपयोग होऊ शकतो, रक्तदान चळवळीचे भवितव्य, युवकांची सामाजिक जबाबदारी, पर्यावरण संवर्धन, आरोग्यविषयक जनजागृती आणि विविध सामाजिक विषयांवर जगद्गुरू नरेंद्राचार्यजी यांच्याशी मुक्त संवाद साधण्याची संधी मिळणार आहे.

कार्यक्रमाला महाराष्ट्र राज्य रक्त संक्रमण परिषदेचे अध्यक्ष डॉ. सुहास मोहनळकर, ROTO-SOTTO चे नोडल अधिकारी डॉ. आकाश शुक्ला, पद्मश्री डॉ. तात्याराव लहाने, ज्येष्ठ अभिनेते व पर्यावरण संवर्धक सयाजी शिंदे, यांच्यासह विविध क्षेत्रांतील मान्यवर उपस्थित राहणार आहेत.

हा कार्यक्रम रविवार, १६ ऑगस्ट २०२६ रोजी दुपारी २ ते ४ या वेळेत महालक्ष्मी लॉन्स, पुणे-नगर रोड, खराडी बायपासजवळ, जुना जकात नाक्यासमोर, पुणे येथे आयोजित करण्यात आला आहे. रक्तदान आणि समाजसेवेच्या राष्ट्रीय चळवळीला नवे बळ देणारा हा उपक्रम ठरणार असल्याची अपेक्षा व्यक्त केली जात आहे. देशभरातील रक्तदाते आणि सामाजिक कार्यकर्त्यांना एकाच व्यासपीठावर आणून रक्तदान व्यवस्थेला अधिक वेगवान, सुलभ आणि परिणामकारक बनविण्याच्या दिशेने हा महत्त्वाचा टप्पा मानला जात आहे.

आपले स्नेहांकित,

(राजन सखाराम बोडेकर)
जनसंपर्क व माध्यम समन्वयक
जगद्गुरू रामानंदाचार्य दक्षिणपीठ – नाणीज धाम
मो. ८८८८२६२७२७ / ९२२५०८८५३०