Amravati Crime : पोलीस आयुक्तालयात गोळीबार, ऑन-ड्युटी जवानाने स्वत:वरच केले गोळीबार

Amravati : शहर पोलीस आयुक्तालयात कार्यरत असलेल्या (QRT) शीघ्र कृती दलामधील एका जवानाने विजय दिलीप नागापुरे (वय ३५) यांनी काल बुधवारी रोजी सकाळी अत्यंत धक्कादायक पाऊल उचलत आत्महत्या केल्याची घटना उघडकीस आली आहे. या घटनेमुळे संपूर्ण पोलीस विभागात खळबळ उडाली असून सहकाऱ्यांमध्ये हळहळ व्यक्त केली जात आहे.

स्वत:च्या डोक्यात गोळी झाडली
मिळालेल्या माहितीनुसार, विजय नागापुरे हे मंगळवारी रात्री नाईट ड्युटीवर होते. ड्युटी पूर्ण केल्यानंतर काल बुधवारी सकाळी सुमारे ९ वाजताच्या सुमारास त्यांनी पोलीस आयुक्तालयातील QRT कार्यालयात स्वतःच्या शासकीय पिस्तुलातून डोक्यात गोळी झाडून आत्महत्या केली. घटनेची माहिती मिळताच पोलीस आयुक्त राकेश ओला, पोलीस उपायुक्त गणेश शिंदे, शाम घुगे यांच्यासह वरिष्ठ अधिकारी तात्काळ घटनास्थळी दाखल झाले.

या घटनेची माहिती सर्वप्रथम QRT मधील पोलीस कर्मचारी आकाश दिलीप अंबरते यांच्या लक्षात आली. त्यांनी तातडीने वरिष्ठ अधिकाऱ्यांना कळविल्यानंतर संपूर्ण यंत्रणा हलली. घटनास्थळी फॉरेन्सिक टीम व डॉग स्कॉडला पाचारण करण्यात आले असून तपासाची प्रक्रिया सुरू करण्यात आली आहे. घटनास्थळावरून पिस्तुलमधील बुलेट जप्त करण्यात आली आहे.

पोलिस दलात खळबळ
मृतदेह पुढील तपासासाठी जिल्हा सामान्य रुग्णालयात शवविच्छेदनासाठी पाठवण्यात आला आहे. विजय नागापुरे हे मूळचे मोर्शी तालुक्यातील धामणगाव काटपूर येथील रहिवासी होते. सध्या ते अमरावती शहरात कुटुंबासह राहत होते. ते २०१४च्या बॅचमध्ये पोलीस खात्यात रुजू झाले होते. त्यांच्या पश्चात कुटुंबीय असून त्यांचा भाऊ शाम नागापुरे हे देखील शहर पोलीस दलात कार्यरत आहेत. दरम्यान, आत्महत्येमागील नेमकं कारण अद्याप स्पष्ट झालेलं नसून पोलीस विभागाकडून या प्रकरणाचा सखोल तपास सुरू आहे. या दुर्दैवी घटनेमुळे पोलीस दलात शोककळा पसरली आहे.