Akola : पोलीस कोठडीत आरोपी महिलेकडे अश्लील मागणी; ASI राजेश जाधववर गुन्हा दाखल, वरिष्ठांनी सर्वांसमोर झापलं

Akola : अकोला पोलिस दलात धक्कादायक घटना समोर आली आहे. ८० लाख रुपयांच्या फसवणूक प्रकरणात पोलीस कोठडीत असलेल्या एका महिला आरोपीकडे सहाय्यक पोलीस उपनिरीक्षक (ASI) राजेश जाधव यांनी ‘शरीरसुखाची’ मागणी केल्याचा गंभीर आरोप करण्यात आला आहे. या घटनेमुळे अकोला पोलीस विभागात प्रचंड खळबळ उडाली असून वरिष्ठांनी तातडीने दखल घेतली आहे.

प्रकरणाची पार्श्वभूमी

माहितीनुसार, नोकरी लावण्याच्या बहाण्याने ८० लाख रुपयांची फसवणूक झाल्याप्रकरणी महिला आरोपीला सायबर पोलीसांनी अटक केली होती. न्यायालयात हजर केले असता तिला दोन दिवसांची पोलीस कोठडी सुनावली होती.

कोठडी दरम्यान आरोपी महिला सिव्हिल लाईन पोलीस ठाण्यात ठेवण्यात आली होती. यावेळी ASI राजेश जाधव यांनी आरोपीकडे शरीरसुखाची मागणी केल्याचा आरोप केला गेला. आरोपी महिलेने ही बाब तात्काळ लेडी पोलीस कर्मचाऱ्यांपर्यंत पोहोचवली.

वरिष्ठांची प्रतिक्रिया

विभागातील एका अधिकाऱ्याने अशा नीच कृत्याची माहिती मिळाल्यानंतर वरिष्ठ पोलीस अधिकाऱ्यांचा पारा चढला. त्यांनी थेट सिव्हिल लाईन पोलीस ठाण्यात जाऊन ASI राजेश जाधवची कानउघडणी केली आणि सर्वांसमोर त्याला झापले. या घटनेमुळे पोलीस ठाण्यात तणावाचे वातावरण निर्माण झाले होते.

तपासाचे आव्हान

महिलेने केलेले आरोप अत्यंत गंभीर आहेत, मात्र यामध्ये खरे तथ्य आहे की फसवणूक किंवा सूडबुद्धीने केले गेले आहे, हे तपासणे पोलिसांसमोर मोठे आव्हान आहे. पोलिस कोठडीत महिला सुरक्षित नसल्याचा संदेश गेल्यास विभागाची प्रतिष्ठा धोक्यात येऊ शकते, त्यामुळे वरिष्ठ अधिकारी प्रकरणाची सखोल चौकशी करत आहेत. अकोल्यातील पोलीस वर्तुळात या घटनेमुळे चर्चा आणि उलटसुलट प्रकरणांना उधाण आले आहे.