लातूर: नातू सांभाळेना, नव्वदीतल्या आजीबाईंनी असा शिकवला धडा! जमीन परत मिळवण्यासाठी जिंकली कायदेशीर लढाई.

लातूर: जिल्ह्यातील कारसा येथील ९० वर्षीय हौसाबाई लहाडे यांनी आपल्या मालमत्तेच्या हक्कासाठी दिलेली कायदेशीर लढाई संपूर्ण महाराष्ट्रात चर्चेचा विषय ठरली आहे. हौसाबाई यांना स्वतःची अपत्ये नसल्याने त्यांनी त्यांच्या भावाच्या मुलाला दत्तक घेतले होते.

नेमके प्रकरण काय? वृद्धापकाळात आपल्याला आधार मिळेल आणि आपली संपत्ती सुरक्षित राहील, या विश्वासातून हौसाबाई यांनी आपली सुमारे ८ एकर शेती बक्षीसपत्राद्वारे (Gift Deed) आपल्या नातू आणि पणतूंना दिली होती. मात्र, जमीन त्यांच्या नावावर होताच, नातू आणि पणतूंनी
आजीकडे पूर्णपणे दुर्लक्ष करण्यास सुरुवात केली. ते आजीला कोणत्याही प्रकारची मदत करत नव्हते, उलट जमिनीतून मिळणारे उत्पन्न स्वतःच लाटत होते. यामुळे हतबल झालेल्या हौसाबाई यांना प्रचंड मानसिक धक्का बसला आणि त्यांनी न्यायाची वाट धरली.

 

कायदेशीर विजय: हौसाबाई लहाडे यांनी ज्येष्ठ नागरिक पालनपोषण व कल्याण अधिनियम, २००७ अंतर्गत महसूल न्यायालयात धाव घेतली. सुनावणीनंतर उपविभागीय अधिकारी तथा ज्येष्ठ नागरिक न्यायाधिकरणाच्या रोहिणी नन्ने-विरोळे यांनी महत्त्वपूर्ण निकाल दिला. त्यांनी संबंधित बक्षीसपत्र आणि जमिनीच्या फेरफार
नोंदी रद्द करण्याचे आदेश दिले. यामुळे ही ८ एकर जमीन पुन्हा हौसाबाई यांच्या नावावर झाली आहे.

महत्त्वाचे निर्देश: न्यायाधिकरणाने केवळ जमीन परत केली नाही, तर नातू-पणतूंनी या काळात जमिनीतून घेतलेले सरकारी लाभ, अनुदाने आणि पीकविम्याचे पैसे व्याजासह परत करण्याचे निर्देशही दिले आहेत. ही लढाई केवळ हौसाबाईंचा वैयक्तिक विजय नसून, ज्येष्ठ नागरिकांच्या हक्कांचे संरक्षण करणारा
एक मोठा संदेश देणारी घटना ठरली आहे.