6 Illegal Bangladeshi Women Arrested After Midnight Raid!

ब्युटीपार्लर आणि शिवणकामाच्या आमिषाने भारतात आणले, नंतर बुधवार पेठेत ढकलले; ६ बांगलादेशी तरुणींना पुणे पोलिसांकडून अटकपुणे शहरातील मध्यवस्तीत आणि कुप्रसिद्ध रेड लाईट एरिया असलेल्या बुधवार पेठ परिसरातून पुन्हा एकदा आंतरराष्ट्रीय मानवी तस्करीचे (Human Trafficking) धक्कादायक वास्तव समोर आले आहे. पुणे पोलिसांनी शनिवारी मध्यरात्री बुधवार पेठेतील एका इमारतीवर अचानक गुप्त छापा टाकत, भारतात बेकायदेशीरपणे वास्तव्य करणाऱ्या ६ बांगलादेशी महिलांना ताब्यात घेतले आहे. या कारवाईमुळे शहरात विनापरवाना राहणाऱ्या घुसखोरांचे आणि त्यांना वेश्याव्यवसायात ढकलणाऱ्या दलालांचे मोठे रॅकेट उघडकीस आले आहे. मध्यरात्री पोलिसांचा 'सर्जिकल स्ट्राईक':मिळालेल्या माहितीनुसार, पुणे शहर पोलीस आयुक्त अमितेशकुमार यांनी शहरात बेकायदेशीरपणे राहणाऱ्या बांगलादेशी नागरिकांविरुद्ध कडक मोहीम राबवण्याचे आदेश दिले आहेत. याच दरम्यान, परिमंडळ १ चे पोलीस उपायुक्त ऋषीकेश रावले यांच्या पथकाला आणि फरासखाना तसेच खडक पोलीस ठाण्यातील अधिकाऱ्यांना गोपनीय माहिती मिळाली की, बुधवार पेठेतील 'सागर बिल्डिंग' या इमारतीत काही परदेशी महिला राहत असून त्यांच्याकडून सक्तीने अवैध व्यवसाय करून घेतला जात आहे.

या माहितीच्या आधारे पोलिसांनी विशेष पथक तयार करून शनिवारी मध्यरात्री सागर इमारतीला वेढा घातला आणि अचानक छापा टाकला. या कारवाई दरम्यान पोलिसांनी ६ संशयास्पद महिलांना ताब्यात घेतले. त्यांच्याकडे भारतात वास्तव्यासाठी आवश्यक असलेला पासपोर्ट, व्हिसा किंवा कोणतीही वैध कागदपत्रे नव्हती.
ब्युटीपार्लरचे आमिष दाखवून फसवणूक:पोलिसांनी या महिलांची कसून चौकशी केली असता अत्यंत धक्कादायक माहिती समोर आली.
या तरुणींना बांगलादेशातील आणि भारतातील स्थानिक दलालांनी "भारतात चांगल्या पगाराची नोकरी, ब्युटीपार्लरचे काम, शिवणकाम आणि घरकाम मिळवून देतो" असे मोठे आमिष दाखवले होते. या आमिषाला बळी पडून त्यांनी छुप्या मार्गाने भारतीय सीमा पार केली. मात्र, पुण्यात आणल्यानंतर दलालांनी त्यांचे मोबाईल
आणि पैसे काढून घेतले आणि त्यांना धमकावून बुधवार पेठेतील कुंटणखान्यात डांबले व वेश्याव्यवसाय करण्यास प्रवृत्त केले.

गुन्हा दाखल आणि पोलिसांचा तपास सुरू:या प्रकरणी बेकायदेशीररीत्या भारतात प्रवेश करून वास्तव्य केल्याप्रकरणी संबंधित महिलांवर आणि त्यांना वेश्याव्यवसायात ढकलणाऱ्या दलालांवर फरासखाना पोलीस ठाण्यात विविध कलमांखाली गुन्हा दाखल करण्यात आला आहे. या महिलांनी सीमा कशी पार केली,
त्यांना पुण्यात आणणारे मुख्य सूत्रधार कोण आहेत आणि त्यांना कोणी स्थानिक बनावट कागदपत्रे पुरवली का, याचा सखोल तपास पोलीस करत आहेत. दरम्यान, गेल्या वर्षभरात मध्यवर्ती पुणे परिसरातून तब्बल १०३ बांगलादेशी नागरिकांना ताब्यात घेऊन त्यांच्या मायदेशी रवानगी (डिपोर्ट) करण्याची प्रक्रिया करण्यात
आल्याची माहिती पोलिसांनी दिली आहे.