रत्नागिरी: चिपळूणमधील दोघांचा समुद्रात बुडून मृत्यू! मासेमारीसाठी गेलेले दोघे मित्र बुडाले, गुहागरच्या समुद्रकिनाऱ्यावर सापडले मृतदेह

रत्नागिरी: बुधल येथील समुद्रात गोवळकोट (ता. चिपळूण) येथील दोघांचा बुडून मृत्यू झाल्याची घटना मंगळवारी (१८ ऑगस्ट) सकाळी १० वाजण्याच्या दरम्यान उघडकीला आली. सलीम पटेल व जावेद सुर्वे अशी दोघांची नावे असून, त्यांचे अंदाजे वय ५० ते ६० वर्षे इतके आहे. फिशिंग रॉडच्या सहाय्याने मासेमारी करताना हे दोघे समुद्राच्या पाण्यात वाहून गेल्याचा प्राथमिक अंदाज वर्तवला जात आहे.

याबाबत मिळालेल्या प्राथमिक माहितीनुसार, सलीम पटेल व जावेद सुर्वे या दोघांना मासेमारीचा छंद होता. ते दोघे सोमवारी रात्री बुधल किनाऱ्यावर खडकाळ भागात फिशिंग रॉड घेऊन मासेमारीसाठी आले होते. याच दरम्यान समुद्राच्या लाटांचा किंवा पाण्याच्या वेगाचा अंदाज न आल्याने ते वाहून गेले आणि त्यांचा बुडून मृत्यू झाल्याचे सांगण्यात येत आहे. या दोघांचेही मृतदेह मंगळवारी सकाळी समुद्रकिनारी ग्रामस्थांना सापडले.

 

 

या घटनेची माहिती बुधल गावातील ग्रामस्थांना मिळताच त्यांनी गुहागरचे सभापती प्रणव पोळेकर यांच्याशी संपर्क साधला. घटनेची माहिती मिळताच प्रणव पोळेकर घटनास्थळी दाखल झाले. त्यांनी तातडीने पोलिस आणि इतर प्रशासकीय यंत्रणांना फोन करून घटनेची माहिती दिली आणि त्यांना तातडीने घटनास्थळी बोलावून घेतले. पोलिसांनी घटनास्थळी दाखल होऊन दोन्ही मृतदेह ताब्यात घेत पंचनामा केला.

कंपनीत कामाला
जावेद सुर्वे हे लोटे (ता. खेड) येथील एका कंपनीत नोकरीला होते. त्यांच्या पश्चात पत्नी, दोन मुलगे, आई-वडील, भाऊ असा परिवार आहे.

वाहनचालक म्हणून कार्यरत
सलीम पटेल हे स्कूल बसवर वाहनचालक म्हणून काम करत होते. तसेच ते खासगी वाहनावरही चालक म्हणून जात असत. त्यांच्या पश्चात पत्नी, आई, भाऊ असा परिवार आहे.