ओमान: किनारपट्टीजवळ इराणकडून हल्ला, 10 भारतीयांना वाचवण्यात यश

ओमान: किनाऱ्याजवळ इराणी सैन्याने इशारा देणारा गोळीबार केलेल्या व्यापारी जहाजावरील हल्ल्याचा भारताने रविवारी तीव्र निषेध केला. जहाजावर ११ भारतीय खलाशी होते, ज्यांपैकी १० जणांना वाचवण्यात आलं असून एक जण अद्याप बेपत्ता असल्याचं सरकारने म्हटलं आहे.

परराष्ट्र मंत्रालयाकडून निवेदन जारी:-
परराष्ट्र मंत्रालयाने जारी केलेल्या निवेदनात म्हटलं आहे, 'आज पहाटे ओमानच्या किनाऱ्याजवळ जीएफएस गॅलेक्सी या व्यावसायिक जहाजावर झालेल्या हल्ल्याचा आम्ही निषेध करतो. जहाजावरील ११ भारतीय नागरिकांपैकी १० जणांची आतापर्यंत सुटका करण्यात आली आहे, तर १ भारतीय नागरिक बेपत्ता असल्याचं वृत्त आहे.' मस्कतमधील भारतीय दूतावास शोध आणि बचावकार्यासाठी ओमानच्या अधिकाऱ्यांशी समन्वय साधत असल्याचेही मंत्रालयाने पुढे स्पष्ट केले.

 

'ओमानमधील आमचे दूतावास परिस्थितीवर बारीक लक्ष ठेवून आहे आणि सुरू असलेल्या शोध व बचाव मोहिमेत ओमानच्या अधिकाऱ्यांशी सक्रियपणे समन्वय साधत आहे. आम्ही ओमानच्या अधिकाऱ्यांनी केलेल्या सहकार्याबद्दल त्यांचे आभार मानतो', असं मंत्रालयाने सांगितले. या हल्ल्यामुळे जहाजाला भीषण आग लागली आणि कर्मचाऱ्यांना जहाज सोडण्यास भाग पाडले. या मालवाहू जहाजावरील हल्ल्याचा हवाला देत युनायटेड स्टेट्सने इराणवर लष्करी हल्ल्यांची नवीन फेरी सुरू केली.

अमेरिकेने या आठवड्यात इराणी लक्ष्यांवर केलेला हा तिसरा मोठा हल्ला होता. यूएस सेंट्रल कमांड (CENTCOM) च्या मते, अमेरिकेच्या ताज्या हल्ल्यांमध्ये इराणच्या अंदाजे १४० लष्करी तळांना लक्ष्य करण्यात आले. यामध्ये इराणी क्षेपणास्त्र आणि ड्रोन साइट्स, नौदलाची क्षमता, दारूगोळा साठवण, दळणवळण नेटवर्क आणि किनारपट्टीवरील पाळत ठेवण्याच्या ठिकाणांचा समावेश होता. चालू आठवड्यात सलग तीन रात्री झालेल्या हल्ल्यांमध्ये अमेरिकन सैन्याने ३०० हून अधिक तळांवर मारा केल्याचं लष्कराने आपल्या निवेदनात म्हटले आहे.

प्रत्युत्तरादाखल इराणने बहरीन, कुवेत, कतार, संयुक्त अरब अमिराती (UAE) आणि ओमानसह संपूर्ण मध्य पूर्वेतील देशांवर हल्ले केले. २८ फेब्रुवारी रोजी सुरू झालेले युद्ध कायमचे संपवण्यासाठी तेहरान आणि वॉशिंग्टन यांच्यात सुरू असलेल्या वाटाघाटींमध्ये 'होर्मुझची सामुद्रधुनी' हा आता मुख्य विषय ठरला आहे.