परभणी: काळजाचा ठोका चुकवणारी घटना परभणीत शेतातील उघड्या बोअरवेलमध्ये पडला ३ वर्षांचा चिमुकला, युद्धपातळीवर बचावकार्य सुरू

परभणी: शेतात खेळत असताना तीन वर्षांचे बालक बोअरवेलमध्ये पडल्याची घटना बुधवारी जिंतूर तालुक्यातील कौसडी शिवारात घडली. या घटनेमुळे परिसरात खळबळ उडाली असून ग्रामस्थांनी धाव घेत बालकाला सुरक्षित बाहेर काढण्यासाठी शर्तीचे प्रयत्न व जेसीबी मशीनद्वारे खोदकाम सुरू केले आहे.

आधियान शेख नदीम (वय ३ वर्षे, रा. कौसडी, ता. जिंतूर) असे उघड्या बोरवेलमध्ये कोसळलेल्या चिमुकल्याचे नाव आहे. त्याच्या सुखरूपतेसाठी संपूर्ण गाव प्रार्थना करीत आहे. मिळालेली माहिती अशी की, चिमुकला आधियान हा बुधवारी वडिलांसोबत शेतात गेला होता. वडील शेती कामात व्यस्त असताना आधियान हा उघड्या बोरवेलमध्ये पडला. त्यात सुमारे १५ फूट खोल केसिंग पाईपमध्ये जाऊन अडकला आहे. ही बातमी समजताच स्थानिक ग्रामस्थांनी घटनास्थळी तत्काळ धाव घेतली. घटनेचे गांभीर्य ओळखून उपस्थितांनी लागलीच दोन जेसीबी मशीन मागवून बालकाला सुरक्षित बाहेर काढण्यासाठी शर्तीचे प्रयत्न व खोदकाम सुरू केले आहे. या घटनेमुळे परिसरात खळबळ उडाली असून घटनास्थळी ग्रामस्थांची मोठी गर्दी जमली आहे.

 

 

घटनेची माहिती मिळताच बोरी पोलिस ठाण्याचे पथक दाखल झाले असून, रेस्क्यू ऑपरेशन युद्धपातळीवर राबवले जात असून नांदेड येथील आपत्ती व्यवस्थापन पथकाचे पाचारण करण्यात आले आहे. चिमुकल्याला सुखरूप बाहेर काढण्यासाठी संपूर्ण गाव प्रार्थना करत असून सर्वांचे डोळे बचावकार्याकडे लागले आहेत.