पुणे: कर्ज घेऊन शिक्षण पूर्ण केले, तरी नोकरीची शाश्वती नाही, ही आजच्या व्यवस्थेची शोकांतिका; हर्षवर्धन सपकाळ

पुणे: “आमच्या लहानपणी वडीलधारी माणसं सांगायची, 'शिक्षण घे, कुठेतरी नोकरी मिळेल आणि तुझा प्रपंच सुरू होईल.' मात्र, आजच्या काळात बँकेकडून कर्ज काढून किंवा अतोनात आर्थिक संघर्ष करून उच्च शिक्षण पूर्ण केले, तरीही तरुणांना नोकरीची कोणतीही शाश्वती मिळत नाही, ही आजच्या शिक्षण आणि प्रशासकीय व्यवस्थेची सर्वात मोठी शोकांतिका आहे,” अशी परखड व संतप्त भूमिका काँग्रेसचे नेते हर्षवर्धन सपकाळ यांनी मांडली.

सध्या देशात आणि राज्यामध्ये बेरोजगारीची परिस्थिती अत्यंत गंभीर रूप धारण करत चालली आहे. अशा बिकट परिस्थितीत कामगार कायद्यांमध्ये केले जाणारे मनमानी बदल कामगारांच्या आणि नोकरदारांच्या अडचणींमध्ये आणखी मोठी भर घालणारे ठरत आहेत, असा आरोपही त्यांनी यावेळी केला. कामगारांना अधिक असुरक्षित बनवणाऱ्या आणि कंत्राटी व्यवस्थेवर पूर्णपणे अवलंबून राहण्यास भाग पाडणाऱ्या या बदलांविरोधात देशातील सर्व कामगार संघटनांनी आता एकत्र येऊन ठाम व आक्रमक भूमिका घेणे नितांत गरजेचे असल्याचे त्यांनी स्पष्ट केले.

यावेळी विधानपरिषद आमदार भाई जगताप यांनीही उपस्थितांना मार्गदर्शन करताना महात्मा गांधींच्या विचारांची आठवण करून दिली. महात्मा गांधींनी ज्या प्रकारे सर्वसामान्य माणसाच्या मनातील भीती कायमची दूर करून त्याला अन्यायाविरुद्ध धैर्याने लढा देण्याचे बळ दिले, अगदी त्याचप्रमाणे आजच्या कामगारांनी आणि तरुणांनीही मनातली भीती पूर्णपणे झटकून संघटित होण्याची वेळ आली आहे, असे मत त्यांनी व्यक्त केले. वाढती बेरोजगारी, शिक्षण क्षेत्रातील व्यावसायिकता आणि नोकऱ्यांची अनिश्चितता यांमुळे तरुण पिढीमोर निर्माण झालेल्या संकटावर राजकीय व सामाजिक स्तरातून तीव्र चिंता व्यक्त केली जात आहे.