नागपूर: वंदे मातरमचा अपमान करणाऱ्यांवर कठोर कारवाई हवी; चंद्रशेखर बावनकुळे यांची आक्रमक मागणी

नागपूर: वंदे मातरमचा अपमान हा भारताच्या संस्कृतीचा आणि राष्ट्रभक्तीचा अपमान आहे. राष्ट्रगीत आणि राष्ट्रभावनेशी संबंधित विषयांमध्ये कोणत्याही प्रकारचा अवमान सहन केला जाऊ नये. वंदे मातरमचा अवमान करणाऱ्यांवर कठोर कारवाई झाली पाहिजे. यासंदर्भात आपण पंतप्रधान नरेंद्र मोदी आणि केंद्रीय गृहमंत्री अमित शहा यांच्याकडे कारवाईची मागणी करणार असल्याची ठाम भूमिका महसूलमंत्री चंद्रशेखर बावनकुळे यांनी मांडली आहे. सोमवारी ते प्रसारमाध्यमांशी संवाद साधत होते.

यावेळी बोलताना मंत्री बावनकुळे यांनी राष्ट्रगीताचा आणि राष्ट्रभावनेचा अवमान करणाऱ्या प्रवृत्तींवर तीव्र शब्दांत नाराजी व्यक्त केली. ते म्हणाले की, देशाच्या अस्मितेशी आणि राष्ट्रीय प्रतीकांशी जोडलेल्या मुद्यांवर कोणीही तडजोड करू शकत नाही. अशा घटनांची गंभीर दखल घेऊन संबंधित दोषींवर तात्काळ कडक कायदेशीर कारवाई झाली पाहिजे, जेणेकरून भविष्यात कोणाचीही अशा प्रकारच्या कृत्याची पुनरावृत्ती करण्याची हिंमत होणार नाही.

पृथ्वीराज चव्हाण यांच्या वक्तव्यावर टीका: याच पत्रकार परिषदेत भाजपचे दिवंगत नेते गोपीनाथ मुंडे यांच्याबाबत काँग्रेसचे ज्येष्ठ नेते पृथ्वीराज चव्हाण यांनी केलेल्या वक्तव्याचाही बावनकुळे यांनी तीव्र शब्दात निषेध केला. पृथ्वीराज चव्हाण हे एक ज्येष्ठ नेते आहेत, मात्र केवळ प्रसारमाध्यमांमध्ये चर्चेत राहण्यासाठी किंवा प्रसिद्धी मिळवण्यासाठी अशा प्रकारची विधाने करणे त्यांच्याकडून अजिबात अपेक्षित नाही, असे ते म्हणाले. गोपीनाथ मुंडे यांनी भारतीय जनता पार्टीच्या आणि देशाच्या राजकारणात मोठे योगदान दिले असून पक्षाने त्यांना नेहमीच सर्वोच्च सन्मान दिला आहे.

पुढे बोलताना बावनकुळे म्हणाले की, जन्म आणि मृत्यू कोणाच्याही हातात नसतो. एखादी व्यक्ती आज हयात नसताना त्यांच्या निधनानंतर किंवा भूतकाळातील घटनांवर बोट ठेवून अशा पद्धतीने वक्तव्य करून आदराला गालबोट लावणे अत्यंत चुकीचे आहे. चव्हाण यांनी आपण कोणाबद्दल आणि कशासंदर्भात बोलत आहोत, याचे भान ठेवून व विचार करूनच वक्तव्य करावे, असा सल्लाही त्यांनी दिला. याशिवाय निवडणुका आणि इतर राजकीय घडामोडींवरही त्यांनी आपली परखड मते मांडली.