सिंहगडावर पर्यटकांच्या सुरक्षेचा प्रश्न ऐरणीवर; सलग दोन दिवस मारामारी, दगडफेकीने खळबळ

खडकवासला : निसर्गाचा आनंद लुटण्यासाठी हजारो पर्यटक ऐतिहासिक सिंहगडावर येत असताना, मागील दोन दिवसांत घडलेल्या मारामारी, छेडछाड आणि दगडफेकीच्या घटनांनी या आनंदाला मोठे गालबोट लागले आहे. स्वातंत्र्यदिनाच्या दिवशी छेडछाडीच्या प्रकारावरून दोन गटांत तुफान हाणामारी झाली. समाजमाध्यमांवर प्रसारित झालेल्या व्हिडिओमध्ये तरुणांनी एकमेकांवर दगडांनी मारहाण केल्याचे स्पष्टपणे दिसून येत आहे. या घटनेची चर्चा सुरू असतानाच, रविवारी आणखी एक संतापजनक प्रकार समोर आला. यामध्ये एका अल्पवयीन मुलीच्या कपड्यांवरून काही मुले आणि ज्येष्ठ महिलेला तथाकथित दुर्गप्रेमी संस्थेच्या सदस्यांकडून मारहाण करण्यात आल्याचा प्रकार घडला.

सलग दोन दिवसांतील या हाणामारी आणि हिंसक घटनांमुळे कुटुंबासह गडावर फिरायला येणाऱ्या सर्वसामान्यांमध्ये आणि पर्यटकांमध्ये भीतीचे वातावरण निर्माण झाले आहे. सिंहगडावर सुटीच्या दिवशी आणि सणांच्या निमित्ताने प्रचंड गर्दी होत असते. या तुफान गर्दीचा गैरफायदा काही हुल्लडबाज आणि विकृत प्रवृत्तीच्या तरुणांकडून घेतला जात असल्याचे समोर आले आहे. गर्दीच्या नावाखाली महिला व तरुणींना जाणीवपूर्वक चुकीचा स्पर्श करण्याचे आणि असभ्य वर्तन करण्याचे प्रकार घडल्याचे काही पर्यटकांनी सांगितले.

गडावर वाढत्या पर्यटकांच्या संख्येच्या तुलनेत सुरक्षा व्यवस्था अत्यंत अपुरी असल्याचे दिसून येत आहे. वन विभाग आणि पोलिस प्रशासनाच्यावतीने प्रभावी नियंत्रण किंवा चोख बंदोबस्त राखला जात नसल्यामुळे समाजकंटकांना मोकळे रान मिळाल्याची भावना पर्यटक व्यक्त करत आहेत. गडावर येणाऱ्या पर्यटकांचे प्राण सुरक्षित राहावेत आणि गडाचे ऐतिहासिक तसेच पवित्र वातावरण कायम राहावे, यासाठी प्रशासनाने तातडीने कठोर आणि कायमस्वरूपी उपाययोजना करण्याची जोरदार मागणी आता सर्व स्तरातून केली जात आहे.