सिंधुदुर्ग: मित्रासोबत मासेमारीसाठी गेलेल्या बेपत्ता तरुणाचा मृतदेह मळगाव घाटीतील धबधब्यात आढळला

सिंधुदुर्ग: सावंतवाडीतून एक अत्यंत दुःखद आणि खळबळजनक बातमी समोर आली आहे. गेल्या दोन दिवसांपासून बेपत्ता असलेले माजगाव-कुंभारवाडी येथील ४८ वर्षीय महेश लक्ष्मण पेडणेकर यांचा मृतदेह मळगाव घाटीतील धबधब्याच संशयास्पद स्थितीत आढळला. मित्रासोबत मासेमारीसाठी गेलेले महेश पेडणेकर अचानक रहस्यमयी रीतीने मृत अवस्थेत सापडल्यामुळे परिसरात मोठी हळहळ व्यक्त होत असून, त्यांच्या मृत्यूचे नेमके कारण काय असावे, याचा शोध सध्या पोलिसांकडून घेतला जात आहे.

नेमकी घटना कशी घडली? प्राप्त माहितीनुसार, महेश लक्ष्मण पेडणेकर (वय ४८, रा. माजगाव-कुंभारवाडी, ता. सावंतवाडी) हे १० ऑगस्ट रोजी दुपारी १२ वाजण्याच्या सुमारास त्यांचे मित्र यशवंत उर्फ योगेश विष्णू परब (रा. चराठा) यांच्यासोबत मासे पकडण्यासाठी घराबाहेर पडले होते. ते दोघे तेरेखोल परिसर व मळगाव घाटीच्या दिशेने गेले होते. मात्र, ठरलेल्या वेळेत आणि रात्री उशिरापर्यंतही महेश घरी परतले नाहीत. कुटुंबीयांनी त्यांचा नातेवाईकांकडे व परिसरामध्ये बरीच शोधाशोध केली, परंतु त्यांचा कोणताही पत्ता लागला नाही, तसेच त्यांचा मोबाईल फोन देखील बंद येत होता.

 

 

पत्नीची पोलिसांत तक्रार आणि शोध मोहीम: पती घरी न परतल्यामुळे चिंतेत पडलेल्या त्यांच्या पत्नी मिनल महेश पेडणेकर (वय ४०) यांनी सावंतवाडी पोलीस ठाण्यात जाऊन पती बेपत्ता असल्याबाबतची अधिकृत तक्रार नोंदवली होती. या तक्रारीनुसार पोलिसांनी नापत्ता नोंद करून त्यांचा शोध सुरू केला होता. यादरम्यान, स्थानिक ग्रामस्थ, नातेवाईक आणि त्यांचे भाऊ रूपेश पेडणेकर हे देखील त्यांचा कसून शोध घेत होते.

धबधब्यात मृतदेह आढळल्याने खळबळ: शोध घेत असताना बुधवारी सकाळी मळगाव घाटीतील दुसऱ्या धबधब्याच्या खालील बाजूस पाण्याच्या प्रवाहात एका व्यक्तीचा मृतदेह तरंगताना व संशयास्पद स्थितीत आढळला. स्थानिकांनी तात्काळ याची माहिती सावंतवाडी पोलिसांना दिली. माहिती मिळताच पोलीस पथक घटनास्थळी दाखल झाले आणि त्यांनी ग्रामस्थांच्या मदतीने मृतदेह पाण्याबाहेर काढून ताब्यात घेतला. प्राथमिक तपासणीत मृत व्यक्ती महेश पेडणेकर असल्याचे निष्पन्न झाले.

मृत्यूच्या कारणाचा शोध सुरू: मित्रासोबत गेलेल्या महेश यांचा मृत्यू नक्की कसा झाला? ते पाय घसरून धबधब्यात किंवा दरीत पडले की यामागे काही घातपात आहे, याबाबत आता उलटसुलट चर्चा सुरू आहेत. पोलिसांनी याप्रकरणी आकस्मिक मृत्यूची नोंद केली असून, मृतदेह शवविच्छेदनासाठी पाठवण्यात आला आहे. वैद्यकीय अहवाल आणि पोलिसांच्या सखोल तपासातूनच मृत्यूचे खरे कारण समोर येणार असून, सावंतवाडी पोलीस या संपूर्ण प्रकरणाचा अधिक तपास करत आहेत.