पेट्रोलमध्ये २०% इथेनॉल मिसळल्याने इंजिन खराब होत नाही! केंद्र सरकार आणि पेट्रोलियम मंत्र्यांचे व्हायरल दाव्यांवर स्पष्टीकरण

नवी दिल्ली :पेट्रोलमध्ये २० टक्के इथेनॉल मिश्रित (E20) इंधनाबाबत सोशल मीडियावर सध्या मोठ्या प्रमाणावर चुकीची माहिती पसरवली जात आहे. या पार्श्वभूमीवर, केंद्रीय पेट्रोलियम आणि नैसर्गिक वायू मंत्रालयाने आणि पेट्रोलियम मंत्र्यांनी या सर्व दाव्यांचे खंडन करत महत्त्वपूर्ण स्पष्टीकरण दिले आहे. सोशल मीडियावर इंजिन खराब होणे, विम्यावर परिणाम होणे, आणि इथेनॉल उत्पादनासाठी पाण्याचा अवाजवी वापर होणे यांसारखे जे दावे केले जात आहेत, ते पूर्णपणे निराधार आणि वैज्ञानिकदृष्ट्या चुकीचे असल्याचे मंत्रालयाने म्हटले आहे.

सरकारचे स्पष्टीकरण आणि वस्तुस्थिती:

• इंजिनची सुरक्षितता: ई-२० इंधन हे शास्त्रोक्त पद्धतीने चाचणी केलेले आणि सतत देखरेखीखाली असलेले इंधन आहे. ऑटोमोटिव्ह रिसर्च असोसिएशन ऑफ इंडिया (ARAI) आणि भारतीय तेल कंपन्यांच्या अभ्यासानुसार, ई-२० इंधनामुळे इंजिनचे नुकसान किंवा गंज लागण्याचा कोणताही धोका नसल्याचे सिद्ध झाले आहे.

• विमा आणि वॉरंटी: ई-२० इंधनाचा वापर केल्यामुळे कंपन्यांकडून विमा किंवा वॉरंटी नाकारली जाणार नाही, असे वाहन उत्पादक कंपन्यांनी (OEMs) स्पष्ट केले आहे.

• पाण्याचा वापर आणि साखर: इथेनॉल उत्पादनासाठी पाण्याचा अतिवापर होतो, हा दावाही चुकीचा आहे. ऊसाच्या अतिरिक्त रसाचा वापर केवळ इथेनॉलसाठी केला जातो, तर मुख्य उत्पादन साखर असते. शिवाय, डिस्टिलरीज आता 'झिरो लिक्विड डिस्चार्ज' तंत्रज्ञानाचा वापर करत आहेत, ज्यामुळे पाण्याचा पुनर्वापर होतो.

• मुंग्यांचे आकर्षण: सोशल मीडियावर काही व्हिडिओंत मुंग्या किंवा मधमाश्या इंधन टाकीकडे आकर्षित होत असल्याचा दावा केला आहे. मात्र, इंधन-ग्रेड इथेनॉल हे ऊर्ध्वपातन (distillation) प्रक्रियेतून तयार होत असल्याने त्यात कोणतीही नैसर्गिक साखर शिल्लक राहत नाही, त्यामुळे असा दावा करणे धादांत खोटे आहे.

इंधन धोरणाचे फायदे:

भारत सरकारने डिसेंबर २०२५ मध्येच २० टक्के इथेनॉल मिश्रणाचे उद्दिष्ट साध्य केले आहे. या धोरणामुळे कच्च्या तेलाच्या आयातीवरील अवलंबित्व कमी झाले असून, देशाचे लाखो कोटींचे परकीय चलन वाचले आहे. तसेच, यामुळे प्रदूषण कमी होण्यास आणि शेतकऱ्यांचे उत्पन्न वाढण्यास मोठी मदत झाली आहे.