पुणे: वीकेंडला सिंहगडला जाण्याचा विचार करताय? सावधान! पायरीमार्गावर दरड कोसळली, प्रशासनाचे पर्यटकांना आवाहन

पुणे: ऐतिहासिक आणि पर्यटकांचे आवडते ठिकाण असलेल्या किल्ले सिंहगडावर दरड कोसळल्याची घटना समोर आली आहे. पावसाचा जोर वाढल्याने सिंहगड किल्ल्याच्या पायरीमार्गावर ही घटना घडली आहे.

नेमकी घटना: मिळालेल्या प्राथमिक माहितीनुसार, दरड कोसळण्याची ही घटना किल्ल्यावरील पहिल्या दरवाज्याजवळ घडली आहे. गडावर सध्या मुसळधार पाऊस सुरू असल्यामुळे डोंगराचा काही भाग आणि दगड थेट पायरी मार्गावर येऊन पडले आहेत, ज्यामुळे मार्गात अडथळे निर्माण झाले आहेत. सुदैवाने, या घटनेत कोणतीही जीवितहानी झालेली नाही.

 

प्रशासनाचे आवाहन: सध्या संपूर्ण पुणे जिल्हा आणि घाट माथ्यावर मुसळधार पाऊस सुरू असून, सिंहगड किल्ल्यावरही पावसाचा जोर प्रचंड वाढला आहे. धुके आणि निसरड्या रस्त्यांमुळे धोका वाढला असल्याने, गडावर येणाऱ्या सर्व पर्यटकांनी स्वतःची आणि कुटुंबाची काळजी घेण्याचे आवाहन प्रशासकीय यंत्रणेकडून करण्यात आले आहे. प्रशासनाने दिलेल्या सूचनांचे काटेकोरपणे पालन करावे, असेही सांगण्यात आले आहे. सध्या पायरी मार्गावरील दगड हटवण्याचे काम सुरू असून, पर्यटकांनी परिस्थितीचे गांभीर्य ओळखून पुढील काही दिवस सिंहगडावर येणे टाळावे किंवा आल्यास योग्य ती काळजी घ्यावी, असे आवाहन करण्यात आले आहे.