मुंबई: तुकाराम मुंढेंचा बड्या हॉटेल्सना दणका, स्वयंपाकघरात उंदीर ते झुरळे; ६ नामांकित हॉटेल्स आणि रेस्टॉरंट्सचे परवाने थेट निलंबित!

मुंबई: आपल्या कडक आणि शिस्तप्रिय कार्यपद्धतीसाठी लोकप्रिय असलेले डॅशिंग आयएएस (IAS) अधिकारी आणि राज्याच्या अन्न व औषध प्रशासनाचे (FDA) नवनियुक्त आयुक्त तुकाराम मुंढे यांनी आता मुंबईतील अस्वच्छ आणि नियम धाब्यावर बसवणाऱ्या हॉटेल्सविरुद्ध आपला मोर्चा वळवला आहे. अन्न सुरक्षा नियमांचे गंभीर उल्लंघन करणाऱ्या मुंबईतील तब्बल ६ बड्या हॉटेल्स, रेस्टॉरंट्स आणि बेकऱ्यांवर एफडीएने धडक कारवाई करत त्यांचे परवाने (लायसन्स) थेट निलंबित केले आहेत. मुंढे यांच्या या दणक्यामुळे मुंबईतील बड्या हॉटेल व्यावसायिकांचे धाबे दणाणले आहेत.

आदित्य बिर्ला समूहाच्या रेस्टॉरंटवरही कारवाई
तुकाराम मुंढे यांच्या कारवाईचा दणका आदित्य बिर्ला समूहाशी संबंधित एका नामांकित रेस्टॉरंटलाही बसला आहे. नरिमन पॉइंट येथील 'फ्लिंट अँड वार्सा' (Flint & Varsa) या हायप्रोफाईल रेस्टॉरंटची २७ जून रोजी तपासणी करण्यात आली. या तपासणीदरम्यान अन्नपदार्थांच्या चुकीच्या ब्रँडिंगचे (Misbranding) प्रकार आढळून आले. ग्राहकांची दिशाभूल होत असल्याचे निदर्शनास आल्यानंतर संबंधित रेस्टॉरंटचा परवाना निलंबित करण्यात आला आहे. याशिवाय १६ हजार २०१ रुपयांचे मुदतबाह्य (Expired) अन्नपदार्थही आढळून आले, जो साठा तात्काळ नष्ट करण्यात आला.

 

'या' हॉटेल्स आणि बेकरींवर झाली कारवाई:
१. हॉटेल गोपालकृष्ण (सांताक्रूझ पूर्व): या हॉटेलच्या थेट स्वयंपाकगृहात (किचनमध्ये) उंदीर फिरताना आढळून आले. ड्रेनेजमध्ये कचरा साचलेला होता आणि परिसरात मोठी दुर्गंधी पसरलेली होती.

२. कराक एंटरप्रायझेस (अंधेरी): या नामांकित ठिकाणी किचन आणि साठवणुकीच्या जागी झुरळांचा मोठा प्रादुर्भाव आढळला.

३. मद्रास डायरीज (वांद्रे): सेलेब्रिटीजच्या आवडीच्या वांद्रे परिसरातील या प्रसिद्ध हॉटेलमध्ये स्वच्छतेचे कोणतेही नियम पाळले जात नसल्याचे उघड झाले.

४. एम. के. बेकरी (बोरीवली): या बेकरीमध्ये नूतनीकरणाचे काम सुरू असतानाच, धूळ आणि कचऱ्यात अन्न उत्पादन सुरू होते. तसेच योग्य लेबल नसलेला संशयास्पद साठाही जप्त करण्यात आला.

५. हॉटेल श्रीकृष्ण (भांडुप): येथील फ्रिजची स्थिती अत्यंत निकृष्ट आणि आरोग्यास घातक होती, तसेच स्वच्छतेच्या अनेक त्रुटी आढळल्या.

नागरिकांना आवाहन:
नागरिकांच्या आरोग्याशी कोणतीही तडजोड सहन केली जाणार नाही, असा स्पष्ट संदेश तुकाराम मुंढे यांनी दिला आहे. सार्वजनिक आरोग्याशी खेळ करणाऱ्या कोणत्याही व्यक्ती किंवा आस्थापनेला पाठीशी घातले जाणार नाही, असे एफडीएने स्पष्ट केले. अन्नपदार्थांच्या गुणवत्तेबाबत शंका असल्यास किंवा कुठेही अस्वच्छता आढळल्यास नागरिकांनी त्वरित तक्रार नोंदवावी, असे आवाहन एफडीएने (FDA) केले आहे. यासाठी प्रशासनाने १८००२२२३६५ (1800222365) हा टोल-फ्री हेल्पलाइन क्रमांक उपलब्ध करून दिला आहे.



शहर

महाराष्ट्र

गुन्हा

मनोरंजन

विडियो गॅलेरी

देश विदेश

Leave a Reply

Your email address will not be published. Required fields are marked *