स्मार्ट मीटरचा ग्राहकांनाच मोठा झटका! सोलर असूनही आले हजारो-लाखोंचे बिल; सॉफ्टवेअरमधील त्रुटीमुळे ग्राहक त्रस्त.

नागपूर: वीजबिलात दिलासा मिळावा म्हणून लाखो रुपये खर्च करून घरांच्या छतावर रूफटॉप सोलर प्रणाली बसविणाऱ्या नागपूरकरांना आता अवाजवी वीजबिलांचा मोठा फटका बसत आहे. अनेकांना १० ते १२ हजार, तर काहींना चक्क १ लाख रुपयांहून अधिकचे बिल आल्याने सोलरधारक नागरिकांमध्ये संतापाचे वातावरण आहे. या अनाकलनीय कारभार मागे 'स्मार्ट मीटर'च्या सॉफ्टवेअरमधील तांत्रिक त्रुटी असल्याचे उघड झाले आहे.

 

नेमके काय घडले?

जून महिन्यात सोलर ग्राहकांच्या वीजबिलांच्या तक्रारींमध्ये मोठ्या प्रमाणात वाढ झाली आहे. भाजपचे विदर्भ विभागीय संघटनमंत्री राहिलेले दिवंगत अरविंद शाहपूरकर यांचे कुटुंबही या फसवणुकीचे बळी ठरले आहे. त्यांच्या पत्नी मीरा शाहपूरकर यांनी सांगितले की, गेल्या महिन्यात रहिवाशांच्या पूर्वपरवानगीशिवाय इमारतीत स्मार्ट मीटर बसविण्यात आले आणि त्यानंतर लगेच वीजबिलात मोठी वाढ झाली. मार्च महिन्यात ७८० रुपये बिल आले असताना, आता अचानक १३ हजार ५० रुपयांचे बिल आल्याने त्यांना धक्काच बसला.

 

सॉफ्टवेअरची चूक की मीटरचे प्रोग्रामिंग?

या वाढीव बिलांबाबत महावितरणच्या अधिकाऱ्यांनी प्राथमिक माहिती देताना सांगितले की, स्मार्ट मीटरच्या सॉफ्टवेअरमध्ये किंवा प्रोग्रामिंगमध्ये काही त्रुटी असण्याची दाट शक्यता आहे. या संदर्भात मोठ्या प्रमाणावर तक्रारी प्राप्त झाल्या असून, मुख्य अभियंता राजेश नाईक यांनी अधीक्षक अभियंते प्रफुल्ल लाडे आणि संजय वाकडे यांना या प्रकरणाची तातडीने चौकशी करण्याचे निर्देश दिले आहेत.

नागरिकांमध्ये वाढता रोष:

स्मार्ट मीटरच्या कार्यप्रणालीबाबत नागपूरमध्ये आधीच असंतोष आहे. याआधीही स्मार्ट मीटरच्या वाढत्या बिलांच्या विरोधात विविध समित्यांनी आंदोलने केली आहेत. ग्राहकांच्या संमतीशिवाय मीटर न बसविणे आणि वीजबिलात पारदर्शकता ठेवणे यांसारख्या मागण्या जोर धरत आहेत. आता या सॉफ्टवेअर गोंधळामुळे नागरिकांचा स्मार्ट मीटरवरील विश्वास आणखीनच डळमळीत झाला आहे. महावितरण प्रशासन आता या त्रुटी कशा सुधारते, याकडे सर्वांचे लक्ष लागले आहे.