मुंबई लोकल: महिलांच्या सुरक्षेसाठी लावलेले 'टॉकबॅक' सिस्टीमच बंद; रेल्वे प्रवाशांच्या सुरक्षिततेचा प्रश्न पुन्हा ऐरणीवर!

मुंबई लोकलच्या महिला डब्यांमध्ये प्रवाशांच्या सुरक्षेसाठी बसविण्यात आलेली 'टॉकबॅक' (Talkback) यंत्रणा अनेक ठिकाणी निष्क्रिय असल्याचे धक्कादायक वास्तव समोर आले आहे. धावत्या लोकलमध्ये घडलेल्या एका खुनाच्या घटनेनंतर महिला प्रवाशांच्या सुरक्षेचा मुद्दा पुन्हा एकदा गंभीर झाला असतानाच, 'लोकमत'ने केलेल्या प्रत्यक्ष पाहणीत ही यंत्रणा अनेक लोकलमध्ये प्रतिसाद देत नसल्याचे उघड झाले आहे.

 

नेमका प्रकार काय? पश्चिम रेल्वेकडून महिला डब्यांमध्ये आपत्कालीन परिस्थितीत प्रवाशांना थेट गार्डशी संपर्क साधता यावा, यासाठी 'टॉकबॅक' प्रणाली बसवण्यात आली आहे. मात्र, 'लोकमत'च्या प्रतिनिधीने चर्चगेट ते लोअर परळ दरम्यान केलेल्या प्रत्यक्ष चाचणीमध्ये अनेक वेळा बटण दाबूनही कोणताही प्रतिसाद मिळाला नाही. काही ठिकाणी संपर्क झाला तरी मदत वेळेत पोहोचली नाही, तर काही मोजक्या ठिकाणीच यंत्रणा कार्यक्षम असल्याचे आढळले.

रेल्वे प्रशासनाची माहिती: पश्चिम रेल्वेच्या आकडेवारीनुसार, महिला डब्यांसाठी एकूण ४६८ टॉकबॅक यंत्रणांची आवश्यकता आहे. त्यापैकी ४२३ यंत्रणा कार्यान्वित केल्याचा दावा रेल्वे प्रशासनाकडून केला जात आहे. अद्याप ४५ यंत्रणा बसविण्याचे काम बाकी आहे. टॉकबॅक बटण दाबल्यानंतर गार्डच्या केबिनमध्ये अलार्म वाजून सूचक दिवा लागतो आणि गार्ड संवादाद्वारे नियंत्रण कक्षाशी संपर्क साधतो, अशी ही यंत्रणा आहे.

प्रवासी संघटनांची मागणी: अनेक डब्यांमधील यंत्रणा निकामी असल्याने महिला प्रवाशांमध्ये भीतीचे वातावरण आहे. महिलांची सुरक्षा ही सर्वोच्च प्राथमिकता असावी, अशी मागणी प्रवासी संघटनांकडून केली जात आहे. केवळ यंत्रणा बसवणे पुरेसे नसून, त्यांची वेळोवेळी तपासणी करून त्या नेहमी कार्यरत राहतील, याची जबाबदारी रेल्वे प्रशासनाने घ्यावी, असे मत व्यक्त होत आहे.

रेल्वे प्रशासनाचे आश्वासन: प्रवाशांची सुरक्षा ही आमची सर्वोच्च प्राथमिकता आहे. टॉकबॅक यंत्रणेच्या कार्यक्षमतेबाबत आढळलेल्या त्रुटींची तातडीने दुरुस्ती केली जाईल आणि सुरक्षा यंत्रणा अधिक सक्षम करण्यासाठी सर्व आवश्यक पावले उचलली जातील, असे पश्चिम रेल्वेचे मुख्य जनसंपर्क अधिकारी विनीत अभिषेक यांनी स्पष्ट केले आहे.

 

सविस्तर वाचा, लिंक कमेंट मध्ये https://punenews24.in/