'ऑपरेशन सिंदूर'च्या वीरांना मानाचा मुजरा; ६ जवानांची नावे अखेर जाहीर; राष्ट्रीय युद्ध स्मारकात कोरले जाणार नाव!

नवी दिल्ली: मे २०२५ मध्ये पहलगाम येथील दहशतवादी हल्ल्याला प्रत्युत्तर म्हणून भारताने राबवलेल्या 'ऑपरेशन सिंदूर'मध्ये देशासाठी सर्वोच्च बलिदान देणाऱ्या ६ जवानांची नावे केंद्र सरकारने पहिल्यांदाच अधिकृतपणे जाहीर केली आहेत. या शूरवीरांचे नाव आता नवी दिल्लीतील राष्ट्रीय युद्ध स्मारकात (National War Memorial) 'रोल ऑफ ऑनर'मध्ये कायमस्वरूपी कोरले जाणार आहे.

देशासाठी बलिदान दिलेले ६ वीर:

१. सुभेदार मेजर पवन कुमार (१० इन्फंट्री ब्रिगेड मुख्यालय)

२. रायफलमॅन सुनील कुमार (४ थी बटालियन, जम्मू आणि काश्मीर लाईट इन्फंट्री - मरणोत्तर 'वीर चक्र')

३. लान्स नाईक दिनेश कुमार (५ वी फील्ड रेजिमेंट)

४. अग्निवीर मूड मुरली नायक (८५१ वी लाईट रेजिमेंट)

५. हवालदार सुनील कुमार सिंग (२३७ वी फील्ड वर्कशॉप)

६. सार्जंट सुरेंद्र कुमार (भारतीय वायुसेना, ३९ विंग - मरणोत्तर 'वायू पदक')

'ऑपरेशन सिंदूर'चा इतिहास:

२२ एप्रिल २०२५ रोजी पहलगाम येथे झालेल्या भीषण दहशतवादी हल्ल्यात २६ निष्पाप नागरिकांचा मृत्यू झाला होता. या हल्ल्याचा सूड घेण्यासाठी भारताने ७ मे २०२५ रोजी 'ऑपरेशन सिंदूर' मोहीम हाती घेतली होती. या मोहिमेत भारतीय सैन्य, नौदल आणि वायुसेनेने एकत्रितपणे पाकिस्तानव्याप्त काश्मीर आणि पाक सीमेवरील ९ प्रमुख दहशतवादी तळांचा खात्मा केला होता.

ही मोहीम भारताच्या ‘झिरो टॉलरन्स’ धोरणाचे प्रतीक मानली जाते. भारताने या मोहिमेदरम्यान अत्यंत अचूकतेने दहशतवादी ठिकाणांना लक्ष्य केले आणि कोणत्याही नागरी हानीशिवाय हे ऑपरेशन फत्ते केले होते. आज एक वर्षानंतर, या वीरांचे नाव राष्ट्रीय स्मारकात सुवर्णअक्षरांनी कोरून त्यांना भावपूर्ण श्रद्धांजली वाहिली जात आहे.