बीड हादरलं! परळीत जुन्या वादातून भरदिवसा युवकावर तलवार आणि धारदार शस्त्राने जीवघेणा हल्ला; 'तुला जिवंत सोडणार नाही' म्हणत धमकावले

बीड  जिल्ह्यातील परळी वैजनाथ शहरात गुन्हेगारीच्या घटनांमध्ये सातत्याने वाढ होत असतानाच, भरदिवसा घडलेल्या एका थरारक आणि धक्कादायक घटनेमुळे संपूर्ण जिल्हा हादरला आहे. शहरातल्या अंबाजोगाई रोडवरील एका हॉटेल परिसरात जुन्या वैयक्तिक वादाच्या कारणावरून काही जणांनी संगनमत करून एका युवकावर धारदार शस्त्र, लोखंडी कत्ती आणि रॉडने जीवघेणा हल्ला केला आहे. हल्ला करताना संशयित आरोपींनी अत्यंत हिंसक रूप धारण करत "तुला आता जिवंत सोडणार नाही," अशी थेट धमकी देत परिसरात दहशत निर्माण केली. या हल्ल्यात दोन जण गंभीर जखमी झाले असून त्यांच्यावर अतिदक्षता विभागात उपचार सुरू आहेत.

 

 

पैशांच्या व्यवहारातून आणि जुन्या वादातून गाठले

मिळालेल्या माहितीनुसार, फिर्यादी पवन संगमेश्वर फुटके (वय ३३, रा. शास्त्रीनगर, परळी वैजनाथ) हे दुपारच्या सुमारास बँकेतून सुमारे २ लाख ५१ हजार रुपये काढून बाहेर पडले होते. त्याच वेळी जुन्या वादाची कुरापत काढून आरोपींनी त्यांना राजगड हॉटेल परिसराजवळ अडवले. सुरुवातीला आरोपींनी शिवीगाळ करत पवन यांना जबरदस्तीने कॅबीनमध्ये ओढून नेले आणि मारहाण करण्यास सुरुवात केली. काही क्षणांतच हा वाद अत्यंत हिंसक वळणावर गेला.

लोखंडी कत्ती आणि रॉडने सपासप वार

कॅबीनमधून बाहेर पडण्याचा प्रयत्न करत असताना संशयित आरोपींनी जीवे मारण्याच्या उद्देशाने पवन यांच्यावर धारदार लोखंडी कत्ती आणि तलवारवजा शस्त्राने थेट मानेवर वार करण्याचा प्रयत्न केला. बचावासाठी हात पुढे केला असता पवन यांच्या डाव्या हाताला गंभीर दुखापत होऊन फ्रॅक्चर झाले आहे. तसेच त्यांच्या पाठीवर लोखंडी रॉडने प्रहार करण्यात आले. या दरम्यान भांडण सोडवण्यासाठी आणि मध्यस्थी करण्यासाठी पुढे आलेले त्यांचे सहकारी सोमनाथ वाघमारे आणि मेव्हणे शंकर कौले यांच्यावरही आरोपींनी हल्ला करून त्यांना गंभीर जखमी केले.

गुन्हा दाखल, पोलिसांकडून दोघांना अटक

या रक्ताळलेल्या थरारानंतर आरोपींनी घटनास्थळावरून पळ काढला. जखमींना तातडीने परळी येथील शासकीय रुग्णालयात दाखल करण्यात आले होते. मात्र, त्यांची गंभीर प्रकृती पाहता पुढील उपचासाठी त्यांना स्वामी रामानंद तीर्थ शासकीय वैद्यकीय महाविद्यालय व रुग्णालय, अंबाजोगाई येथे हलविण्यात आले आहे. पवन फुटके यांच्या फिर्यादीवरून परळी शहर पोलीस ठाण्यात अनंत गणेश ढोपरे, संतोष जीवनराव शिंदे, अभिजीत गणेश ढोपरे आणि नरेश वाळके या चार जणांविरोधात विविध गंभीर कलमांन्वये गुन्हा दाखल करण्यात आला आहे. पोलिसांनी तात्काळ कारवाई करत दोन आरोपींना ताब्यात घेतले असून फरार आरोपींचा शोध युद्धपातळीवर सुरू आहे.

 

सविस्तर वाचा, लिंक कमेंट मध्ये https://punenews24.in/