कल्याणमध्ये क्रूरतेचा कळस! हुंड्यासाठी गर्भवती महिलेचे मुंडण, गरम पाण्याने चटके देत सासरच्यांनी केला छळ!

कल्याणच्या वालधुनी परिसरातून एक अत्यंत धक्कादायक आणि संतापजनक घटना समोर आली आहे. हुंड्यासाठी एका गर्भवती महिलेचा तिच्या सासरच्या मंडळींनी अमानुष छळ केल्याचा प्रकार उघडकीस आला आहे. आरोपींनी या महिलेच्या डोक्याचे केस कापून तिचे मुंडण केले, तसेच तिला गरम पाण्याचे चटके देऊन मारहाण केली. या घटनेमुळे परिसरात एकच खळबळ उडाली आहे.

 

 

नेमकं प्रकरण काय?

मिळालेल्या माहितीनुसार, पीडित महिलेचा विवाह नोव्हेंबर २०२५ मध्ये कल्याणच्या वालधुनी परिसरात राहणाऱ्या समीर अन्सारी याच्याशी झाला होता. लग्नावेळीच मुलीच्या माहेरच्यांनी आपली हुंडा देण्याची आर्थिक परिस्थिती नसल्याचे स्पष्ट केले होते. मात्र, लग्नानंतर सासरच्या मंडळींनी हुंड्यासाठी सुनेचा मानसिक आणि शारीरिक छळ करण्यास सुरुवात केली.

अमानुष छळाची परिसीमा

पीडित महिला गरोदर असतानाही सासरच्या मंडळींनी तिच्यावर अत्याचार करणे थांबवले नाही. हुंड्याची मागणी पूर्ण न झाल्याचा राग धरून नणंद, सासरे आणि पतीने मिळून तिला मारहाण केली. आरोपींनी इतक्यावरच न थांबता तिचे केस कापून तिचे मुंडण केले आणि गरम पाण्याने तिचे हात जाळले. या क्रूर छळामुळे पीडित महिलेची प्रकृती खालावल्याने तिला उपचारासाठी उल्हासनगर येथील मध्यवर्ती रुग्णालयात दाखल करण्यात आले आहे. याप्रकरणी संबंधित पोलीस ठाण्यात गुन्हा दाखल करण्यात आला असून पोलीस अधिक तपास करत आहेत

 

सविस्तर वाचा, लिंक कमेंट मध्ये https://punenews24.in/