सिंधुदुर्ग: प्रेमात डर्टी गेम! लग्नात अडसर ठरणाऱ्या प्रेयसीची प्रियकर शिक्षकाकडून निर्घृण हत्या

नेमकी घटना काय?
कर्नाटक राज्यातील हुबळी येथे शिक्षक म्हणून कार्यरत असलेला ३३ वर्षीय बसवराज करुणावर याचे गंगव्वा सत्याप्पा हंचीमणी (२५) हिच्यासोबत गेल्या काही वर्षांपासून प्रेमसंबंध होते. मात्र, काळांतराने दोघांच्या नात्यात दुरावा निर्माण झाला. बसवराजच्या कुटुंबीयांनी त्याचे दुसरीकडे लग्न ठरवण्याचा प्रयत्न केला असता, गंगव्वाने त्या विवाहास तीव्र विरोध दर्शवला. या विरोधामुळे आपले वैवाहिक आयुष्य आणि करिअर उद्ध्वस्त होईल, या भीतीने बसवराजने तिला कायमचे मार्गातून हटवण्याचा भयानक कट रचला.

कट कसा आखला?
बसवराजने गंगव्वाला गोड बोलून हुबळीवरून बेळगावला आणले. तिथे त्याने एका क्रूझर गाडीची व्यवस्था केली, ज्यामध्ये त्याचे वडील यल्लाप्पा करुणावर (५७) आणि मामा लगमाप्पा अंकलगी (३७) देखील उपस्थित होते. चौघेही गंगव्वाला विश्वासात घेऊन सिंधुदुर्ग जिल्ह्यातील तिलारी घाटात घेऊन आले.

खुनाचा थरार:
तिलारी घाटातील एका निर्जन ठिकाणी तिघांनी मिळून गंगव्वाचा गळा आवळून आणि डोक्यावर प्रहार करून तिची निर्घृण हत्या केली. पुरावा नष्ट करण्याच्या उद्देशाने त्यांनी तिचा मृतदेह घाटातील 'प्रेशर पॉईंट'जवळ दरीत फेकून दिला आणि हा अपघात असल्याचे भासवले.

 

पोलीस तपास आणि अटक:
२९ मे २०२६ रोजी तिलारी घाटात एका अज्ञात महिलेचा मृतदेह सापडल्यानंतर खळबळ उडाली होती. शवविच्छेदन अहवालात हा खून असल्याचे निष्पन्न झाले. सिंधुदुर्ग पोलिसांनी तब्बल १९९ बेपत्ता महिलांच्या प्रकरणांची पडताळणी केली. तपासादरम्यान, पोलिसांनी परिसरातील सीसीटीव्ही फुटेज तपासले, ज्यामध्ये एक संशयास्पद क्रूझर गाडी दिसली. या तांत्रिक पुराव्यांच्या आधारे पोलिसांनी आरोपींचा मागोवा घेतला आणि अखेर बसवराज, त्याचे वडील यल्लाप्पा आणि मामा लगमाप्पा यांना बेड्या ठोकल्या. चौकशीदरम्यान बसवराजने गुन्ह्याची कबुली दिली आहे.