काळाचा क्रूर घाला! मुंबईहून येणाऱ्या लाडक्या लेकीसाठी आमरस बनवायला आंबे आणून परतताना आईचा भीषण अपघातात मृत्यू!

रत्नागिरी/दापोली: रत्नागिरी जिल्ह्यातील दापोली परिसरातून एक अत्यंत मन पिळवटून टाकणारी आणि हृदयद्रावक घटना समोर आली आहे. मुंबईहून गावी येणाऱ्या आपल्या लाडक्या लेकीच्या वाटेकडे डोळे लावून बसलेल्या एका माऊलीचा, लेकीच्या भेटीपूर्वीच रस्ते अपघातात दुर्दैवी मृत्यू झाला. अवघ्या काही तासांपूर्वीच ज्या आईने फोन करून 'कुठे आलीस? कधी पोहोचणार?' अशी काळजीपोटी विचारपूस केली होती, ती आई आता या जगात नाही या विचारानेच मुलीला प्रचंड मोठा धक्का बसला आहे. शिल्पा सुरेश साळवी असे या अपघातात मृत पावलेल्या दुर्दैवी महिलेचे नाव आहे.

लेकीसाठी आमरस बनवण्याचा बेत ठरला शेवटचा: मिळालेल्या माहितीनुसार, शिल्पा साळवी यांची मुलगी मुंबईत वास्तव्याला असून ती आपल्या आईला भेटण्यासाठी मुंबईहून गावी येण्यास निघाली होती. आपली लाडकी लेक खूप दिवसांनी घरी येणार असल्याने शिल्पा साळवी प्रचंड आनंदी होत्या. मुलीला आवडते गोडधोड खाऊ घालण्यासाठी त्यांनी घरी आमरस बनवण्याचा बेत आखला होता. त्यासाठी त्या बाजारात आंबे आणण्यासाठी गेल्या होत्या. मात्र, आंबे घेऊन घरी परतत असताना दापोली-खेड राज्य मार्गावरील टाळसुर शाळेजवळ एका वेगवान अज्ञात वाहनाने त्यांना जोरदार धडक दिली.

धडक देऊन वाहनचालक पसार; पोलीस तपास सुरू: हा अपघात इतका भीषण होता की, यामध्ये शिल्पा साळवी यांचा जागीच मृत्यू झाला. त्यांच्या निधनाची बातमी समजताच मुंबईहून आनंदाने निघालेली मुलगी आणि संपूर्ण साळवी कुटुंबावर दुःखाचा डोंगर कोसळला आहे. अपघात घडल्यानंतर धडक देणारा अज्ञात वाहनचालक गाडीसह घटनास्थळावरून फरार झाला. या प्रकरणी दापोली पोलीस ठाण्यात गुन्हा दाखल करण्यात आला असून, फरार वाहनचालकाचा शोध घेण्यासाठी पोलिसांनी परिसरातील सीसीटीव्ही फुटेज तपासण्यास सुरुवात केली आहे. या घटनेमुळे संपूर्ण दापोली परिसरात तीव्र हळहळ व्यक्त केली जात आहे.