दिल्लीत निर्भया प्रकरणाची पुनरावृत्ती; चालत्या बसमध्ये सामूहिक बलात्कार, दोन आरोपी अटकेत

नवी दिल्ली: देशाची राजधानी दिल्लीतून पुन्हा एकदा मानवतेला काळीमा फासणारी घटना समोर आली आहे. दिल्लीतील सराय काले खान परिसरात एका चालत्या बसमध्ये महिलेवर सामूहिक बलात्कार (Gangrape) करण्यात आल्याचे उघड झाले आहे. याप्रकरणी दिल्ली पोलिसांनी तातडीने कारवाई करत बसचा चालक आणि वाहक या दोघांना अटक केली आहे.

नेमकी घटना काय?
मिळालेल्या माहितीनुसार, पीडित महिला बसमध्ये प्रवास करत असताना बसमधील चालक आणि वाहकाने मिळून तिच्यावर अत्याचार केला. बस चालू असतानाच हा घृणास्पद प्रकार घडला. घटनेनंतर आरोपींनी पीडितेला धमकावून सोडून दिले, मात्र पीडितेने धाडस दाखवत पोलिसांत धाव घेतली.

पोलिसांची कारवाई:
महिलेने दिलेल्या तक्रारीनंतर दिल्ली पोलिसांनी गुन्ह्याचे गांभीर्य ओळखून तपास सुरू केला. तांत्रिक तपासाच्या आणि सीसीटीव्ही फुटेजच्या आधारे पोलिसांनी संबधित बसचा शोध घेतला. यानंतर चालक आणि वाहक या दोन्ही आरोपींना अटक करण्यात आली आहे. पोलिसांनी संबंधित बसही जप्त केली असून पुढील न्यायवैद्यक (Forensic) तपासणी सुरू आहे.

सुरक्षेचा प्रश्न पुन्हा ऐरणीवर:
दिल्लीत सार्वजनिक वाहतूक व्यवस्थेत महिलांच्या सुरक्षेसाठी अनेक उपाययोजना केल्याचा दावा केला जातो, मात्र या घटनेमुळे पुन्हा एकदा सुरक्षेचा प्रश्न ऐरणीवर आला आहे. या घटनेनंतर नागरिकांमध्ये संताप व्यक्त होत असून आरोपींना कठोर शिक्षा देण्याची मागणी केली जात आहे.