मावळ तालुका हादरला! तरुणाचा निर्घृण खून करून मृतदेह दुचाकीसह जाळला; दोन आरोपींच्या पोलिसांनी मुसक्या आवळल्या

पवनानगर (पुणे): पिंपरी-चिंचवड शहराच्या जवळ असलेल्या मावळ तालुक्यातील पवनानगर परिसरात एक अत्यंत भयानक आणि मन सुन्न करणारी घटना उघडकीस आली आहे.

एका ३७ वर्षीय तरुणाचा खून करून, पुरावा नष्ट करण्याच्या उद्देशाने त्याचा मृतदेह त्याच्याच दुचाकीसह जाळून टाकण्यात आला. या घटनेमुळे संपूर्ण मावळ तालुक्यात मोठी खळबळ उडाली आहे.
पुणे ग्रामीण पोलिसांनी या प्रकरणाचा वेगाने तपास करत अवघ्या तीन ते चार तासांत दोन मुख्य आरोपींना बेड्या ठोकल्या आहेत.

नेमकी घटना काय?
मिळालेल्या माहितीनुसार, अमोल अनंता मोहोळ (वय ३७, रा. वारू, ता. मावळ) असे खून झालेल्या तरुणाचे नाव आहे. मंगळवारी (दि. २८ एप्रिल) पवनानगर परिसरातील एका निर्जन स्थळी एका तरुणाचा जळालेला मृतदेह आणि जवळच जळालेली दुचाकी आढळून आली.
मृतदेह इतक्या वाईट रितीने जळाला होता की त्याची ओळख पटवणे कठीण झाले होते. मात्र, पोलिसांनी तांत्रिक तपास आणि स्थानिक माहितीच्या आधारे तो अमोल मोहोळ असल्याचे निष्पन्न केले.

पोलिसांची गतीमान कारवाई:
घटनेची माहिती मिळताच लोणावळ्याचे उपविभागीय पोलीस अधिकारी आणि वरिष्ठ पोलीस निरीक्षकांनी घटनास्थळी धाव घेतली. पोलिसांनी मोबाईल कॉल रेकॉर्ड (CDR)विश्लेषण, तांत्रिक पुरावे आणि गुप्त बातमीदारांकडून मिळालेल्या माहितीवरून तपासाची चक्रे फिरवली.
अवघ्या काही तासांत पोलिसांनी भरत काशिनाथ वाल्हेकर आणि सुनील भिमा पवार (दोघेही राहणार पवनानगर) यांना ताब्यात घेतले. पोलिसी खाक्या दाखवताच त्यांनी गुन्ह्याची कबुली दिली. हत्येचे कारण:प्राथमिक तपासात ही हत्या वैयक्तिक वादातून आणि पूर्ववैमनस्यातून झाल्याचे समोर येत आहे.

आरोपींनी प्रथम अमोलचा खून केला आणि त्यानंतर गुन्हा लपवण्यासाठी त्याचा मृतदेह दुचाकीवर टाकून दोन्ही गोष्टी जाळून टाकल्या. मावळ परिसरात गेल्या आठवडाभरातील ही तिसरी हत्येची घटना असल्याने नागरिकांमध्ये भीतीचे वातावरण आहे.
पुणे ग्रामीण पोलीस या प्रकरणाचा अधिक तपास करत असून फॉरेन्सिक टीमने घटनास्थळावरून महत्त्वाचे नमुने गोळा केले आहेत.