नराधम! अनाथ मैत्रिणीला पोलीस ठाण्याऐवजी नेलं एकांतात; मित्रानेच केला अत्याचार, त्यानंतर जे केलं त्याने डोंबिवली हादरली!

डोंबिवली: डोंबिवली शहरात माणुसकीला काळिमा फासणारी एक अत्यंत धक्कादायक घटना समोर आली आहे. संकटात असलेल्या एका अनाथ तरुणीला मदतीचे आश्वासन देऊन, तिच्याच सोशल मीडियावरील मित्राने तिला निर्जन स्थळी नेऊन तिच्यावर बलात्कार केल्याची संतापजनक घटना घडली आहे. मानपाडा पोलिसांनी याप्रकरणी तत्परता दाखवत आरोपीला अवघ्या एका तासात बेड्या ठोकल्या आहेत.

नेमकी घटना काय? पीडित तरुणी अनाथ असून ती एका खाजगी ठिकाणी नोकरी करून स्वतःचा उदरनिर्वाह करते. सोमवारी तिच्या एका मैत्रिणीच्या कुटुंबीयांनी तिच्यावर खोटे आरोप लावून तिला बेदम मारहाण केली होती. या संकटाच्या वेळी कोणाचा तरी आधार मिळावा, या हेतूने तिने सोशल मीडियावरून ओळख झालेल्या क्रिश भोईर नावाच्या तरुणाशी संपर्क साधला. आपल्याला पोलीस ठाण्यात नेऊन मदत करेल, या आशेने तिने त्याला बोलावले होते.

मदतीच्या बहाण्याने नराधमाचे कृत्य: आरोपी क्रिश भोईर याने तिला पोलीस ठाण्यात नेण्याचे आश्वासन दिले, मात्र प्रत्यक्षात त्याने तिला एका निर्जन आणि एकांत ठिकाणी नेले. तिथे तरुणीच्या हतबलतेचा फायदा घेत त्याने तिच्यावर बळजबरीने अत्याचार केला. इतकेच नाही तर अत्याचार केल्यानंतर त्याने पीडितेचा मोबाईल आणि काही पैसेही हिसकावून घेतले.

तरुणीचे धाडस आणि पोलिसांची कारवाई: या घटनेने खचून न जाता पीडित तरुणीने मोठे धाडस दाखवले. तिने थेट शिंदे सेनेच्या डोंबिवली शाखेत धाव घेऊन आपबिती सांगितली. तिथल्या पदाधिकाऱ्यांनी आणि महिला कार्यकर्त्यांनी तातडीने तिला मानपाडा पोलीस ठाण्यात नेले. पोलिसांनी घटनेचे गांभीर्य ओळखून तात्काळ तपासाची चक्रे फिरवली आणि गुन्हा दाखल झाल्यानंतर अवघ्या एका तासात नराधम क्रिश भोईरला अटक केली.

या घटनेमुळे परिसरात तीव्र संताप व्यक्त होत असून, सोशल मीडियावरील ओळखीबाबत सतर्क राहण्याचे आवाहन केले जात आहे.