उरुळी कांचन: राज हाईट्स अपार्टमेंटमध्ये घरफोडी; पोलिसांनी काही तासांतच आरोपींच्या आवळल्या मुसक्या

उरुळी कांचन: बंद घराचे कुलूप पाहून चोरी करण्याची संधी शोधणाऱ्या दोन सराईत चोरट्यांना उरुळी कांचन पोलिसांनी अवघ्या काही तासांत जेरबंद केले आहे. या कारवाईमुळे परिसरात पोलिसांच्या सतर्कतेचे कौतुक होत आहे.

नेमकी घटना काय?
उरुळी कांचन येथील आश्रम रोड परिसरात असलेल्या 'राज हाईट्स' अपार्टमेंटमध्ये शनिवारी (२५ एप्रिल) दुपारी ३ वाजेच्या सुमारास ही घरफोडी झाली होती. संबंधित सदनिका बंद असल्याचे पाहून चोरट्यांनी हातोड्याच्या साहाय्याने कुलूप तोडले आणि घरात प्रवेश केला. कपाटातील रोख रक्कम आणि दागिने असा सुमारे ७० हजार रुपयांचा मुद्देमाल चोरून नेला होता.

तपासाची चक्रे फिरली:
घटनेची माहिती मिळताच उरुळी कांचन पोलीस ठाण्याचे पथक घटनास्थळी दाखल झाले. सीसीटीव्ही फुटेज आणि तांत्रिक माहितीच्या आधारे पोलिसांनी संशयित आरोपींचा शोध सुरू केला. तपासादरम्यान मिळालेल्या गुप्त माहितीनुसार पोलिसांनी सापळा रचून अनिरुद्ध चौधरी आणि यश खेडेकर या दोन तरुणांना ताब्यात घेतले.

मुद्देमाल जप्त:
पोलिसांनी केलेल्या चौकशीत आरोपींनी गुन्ह्याची कबुली दिली असून, त्यांच्याकडून चोरीला गेलेला ७० हजार रुपयांचा सर्व ऐवज हस्तगत करण्यात आला आहे. ही कारवाई वरिष्ठ पोलीस निरीक्षक सचिन वांगडे यांच्या मार्गदर्शनाखाली पोलीस पथकाने यशस्वी केली.

नागरिकांना आवाहन:
उन्हाळी सुट्ट्यांमुळे अनेक नागरिक गावी किंवा फिरायला जात आहेत. अशा वेळी घराला कुलूप लावताना शेजाऱ्यांना कल्पना द्यावी आणि मौल्यवान वस्तू घरात ठेवू नयेत, असे आवाहन उरुळी कांचन पोलिसांनी केले आहे.