सातारा: मोठी दहशत! आगाशिवनगरात भरवस्तीत शिरला बिबट्या; वनविभागाच्या शूर पथकाने थरारक रेस्क्यू करत केले जेरबंद

सातारा: जिल्ह्यातील मलकापूर परिसरातील आगाशिवनगरमध्ये बिबट्या भरवस्तीत शिरल्याने मोठी खळबळ उडाली आणि नागरिकांमध्ये तीव्र भीतीचे वातावरण पसरले. सकाळी सात वाजण्याच्या सुमारास आगाशिव डोंगरावरून खाली उतरलेला हा बिबट्या बॅकवर्ड सोसायटी आणि इंद्रप्रस्थ कॉलनी परिसरात फिरताना नागरिकांच्या निदर्शनास आला. परिसरातील काही कुत्र्यांनी या बिबट्याचा पाठलाग केल्यामुळे तो सैरावैरा पळू लागला आणि कराड-ढेबेवाडी रस्त्यालगत असलेल्या एका मोकळ्या जागेतील बंद खोक्यात जाऊन लपला.

बिबट्या भरवस्तीत आल्याची बातमी वाऱ्यासारखी पसरताच घटनास्थळी नागरिकांनी मोठी गर्दी केली. गर्दीमुळे कराड-ढेबेवाडी रस्त्यावरील वाहतूक काही काळासाठी पूर्णपणे ठप्प झाली होती. घटनेची माहिती मिळताच वन विभागाचे अधिकारी, कर्मचारी आणि वन्यजीव रक्षक तातडीने घटनास्थळी दाखल झाले. वनविभागाच्या पथकाने अत्यंत सावधानीपूर्वक आणि कौशल्याने एका तासाच्या अथक प्रयत्नानंतर थरारक रेस्क्यू ऑपरेशन राबवून बिबट्याला जाळ्यात पकडले व सुरक्षितपणे जेरबंद केले.

जेरबंद करण्यात आलेला बिबट्या हा अंदाजे पाच महिन्यांचा असल्याचे वनक्षेत्रपाल ललिता पाटील यांनी सांगितले. पकडलेल्या बिबट्याला सुरक्षितपणे पिंजऱ्यात बंद करून वराडे येथील वन्यजीव तपासणी केंद्रात हलवण्यात आले. या यशस्वी रेस्क्यू मोहिमेत सातारा उपवनसंरक्षक अमोल सातपुते, सहाय्यक वनसंरक्षक जयश्री जाधव, कराडच्या वनक्षेत्रपाल ललिता पाटील, वन्यजीव रक्षक रोहन भाटे, वनरक्षक सुनिता जाधव, दशरथ चिट्टे, तसेच कैलास सानप, प्रशांत मोहिते, भारत पाटील, गणेश काळे, रोहित कुलकर्णी, भरत पवार, अमोल माने, बाबा भंडलकर आणि योगेश बडेकर आदी अधिकारी व रेस्क्यू टीमच्या सदस्यांनी महत्त्वाची भूमिका बजावली. बिबट्याला जेरबंद केल्यानंतर नागरिकांनी आणि प्रशासनाने सुटकेचा श्वास सोडला. सध्या ऊस काढणीचा हंगाम आणि वाढत्या जंगलतोडीमुळे वन्यप्राणी सुरक्षित निवाऱ्याच्या शोधात मानवी वस्तीत आणि नागरी भागात येत असल्याचे पुन्हा एकदा स्पष्ट झाले आहे.