नागपूरमध्ये काळीज पिळवटून टाकणारी घटना: पाण्याने भरलेल्या बादलीत पडून ११ महिन्यांच्या चिमुकलीचा अंत

नागपूर (खापा): नागपूर जिल्ह्यातील खापा पोलीस ठाण्याच्या हद्दीतून एक अत्यंत दुर्दैवी आणि मन हेलावून टाकणारी घटना समोर आली आहे. खेळता खेळता एका ११ महिन्यांच्या चिमुकलीचा पाण्याने भरलेल्या बादलीत पडून मृत्यू झाला. केवळ १५ मिनिटांच्या निष्काळजीपणामुळे एका निष्पाप जीवाचा बळी गेल्याने परिसरात हळहळ व्यक्त केली जात आहे.

नेमकी घटना काय?
ही घटना खापा येथील 'वुड्स प्लाय कंपनी'च्या परिसरात घडली. संध्या असे या मृत चिमुकलीचे नाव आहे. मिळालेल्या माहितीनुसार, संध्याची आई घरातील कामात व्यस्त होती. दरम्यान, संध्या रांगता रांगता बाथरूममध्ये गेली. तिथे पाण्याने पूर्ण भरलेली एक बादली ठेवलेली होती. खेळण्याच्या नादात संध्या त्या बादलीत पालथी पडली.

निष्काळजीपणा नडला:
सुमारे १५ मिनिटे झाल्यानंतर जेव्हा आईचे लक्ष संध्याकडे गेले आणि तिने शोध सुरू केला, तेव्हा संध्या बाथरूममधील बादलीत बेशुद्ध अवस्थेत आढळली. तिला तातडीने जवळच्या रुग्णालयात हलवण्यात आले, मात्र डॉक्टरांनी तिला मृत घोषित केले. आई-वडिलांच्या डोळ्यांदेखत त्यांचा आनंदी संसार उद्ध्वस्त झाला असून, या घटनेमुळे संपूर्ण कुटुंबावर दुःखाचा डोंगर कोसळला आहे.

नागरिकांना आवाहन:
लहान मुले घरात असताना पालकांनी विशेषतः बाथरूम, पाण्याच्या टाक्या आणि उघड्या बादल्यांबाबत अत्यंत सावधगिरी बाळगणे आवश्यक आहे, असे आवाहन या घटनेच्या निमित्ताने केले जात आहे. खापा पोलिसांनी याप्रकरणी अकस्मात मृत्यूची नोंद केली असून पुढील तपास सुरू आहे.