अंबाजोगाई (बीड): दहाव्याच्या विधीवेळी गॅस सिलेंडरचा भीषण स्फोट; दोन घरे जळून खाक, जाधव कुटुंबाचा संसार उघड्यावर

अंबाजोगाई (बीड):
अंबाजोगाई तालुक्यातील पट्टीवडगाव येथे आज सकाळी साडे नऊच्या सुमारास गॅस सिलेंडरचा भीषण स्फोट झाल्याची धक्कादायक घटना घडली. पत्नीच्या निधनानंतर दहाव्याच्या विधीसाठी स्वयंपाक सुरू असतानाच ही दुर्घटना घडली असून, यामध्ये दोन घरे आणि घरातील संपूर्ण संसारोपयोगी साहित्य जळून खाक झाले आहे.

नेमकी घटना काय?
पट्टीवडगाव येथील रहिवासी असलेल्या जाधव यांच्या पत्नीचे काही दिवसांपूर्वी निधन झाले होते. आज त्यांच्या दहाव्याचा विधी असल्याने घरात नातेवाईक जमले होते आणि स्वयंपाक सुरू होता. यावेळी अचानक गॅस सिलेंडरचा भीषण स्फोट झाला. स्फोट इतका भीषण होता की, आगीने रौद्र रूप धारण केले आणि जाधव यांच्यासह शेजारच्या घरालाही आपल्या विळख्यात घेतले.

मोठे नुकसान:
या आगीत दोन्ही घरातील धान्य, कपडे, दागिने आणि महत्त्वाची कागदपत्रे जळून खाक झाली आहेत. आगीची बातमी समजताच ग्रामस्थांनी धाव घेऊन आग विझवण्याचा प्रयत्न केला, परंतु तोपर्यंत जाधव कुटुंबाचा संपूर्ण संसार भस्मसात झाला होता. सुदैवाने, या घटनेत कोणतीही जीवितहानी झाली नाही, परंतु राहते घर गमावल्याने हे कुटुंब आता उघड्यावर आले आहे.

प्रशासनाविरुद्ध संताप:
घटनेची माहिती मिळूनही महसूल प्रशासनाकडून पंचनाम्यासाठी विलंब होत असल्याचा आरोप स्थानिकांनी केला आहे. हतबल झालेल्या जाधव कुटुंबाला तातडीने सरकारी मदत मिळावी, अशी मागणी ग्रामस्थांकडून केली जात आहे.