मुंबई लोकलमध्ये माणुसकी हरवली! ज्येष्ठ पत्रकार १५ तास बेशुद्ध अवस्थेत ट्रेनमध्येच;

डोंबिवली/ठाणे: मुंबईची जीवनवाहिनी समजल्या जाणाऱ्या लोकल ट्रेनमध्ये एक अत्यंत धक्कादायक आणि संतापजनक प्रकार समोर आला आहे. डोंबिवलीचे ज्येष्ठ पत्रकार संजय शिंदे हे तब्बल १५ तास लोकलमध्ये बेशुद्ध अवस्थेत पडून होते, मात्र रेल्वे प्रशासन, पोलीस आणि प्रवाशांपैकी कोणाचेही त्यांच्याकडे लक्ष गेले नाही.

नेमकी घटना काय?
मिळालेल्या माहितीनुसार, संजय शिंदे हे बुधवारी (१५ एप्रिल) दुपारी ४ च्या सुमारास शीव (Sion) रेल्वे स्थानकातून लोकलमध्ये चढले होते. प्रवासादरम्यान त्यांना अचानक अस्वस्थ वाटू लागले आणि ते डब्यातच बेशुद्ध पडले. ते रात्री उशिरापर्यंत घरी न परतल्याने आणि मोबाईल बंद असल्याने त्यांच्या कुटुंबीयांनी धारावी पोलीस ठाण्यात बेपत्ता असल्याची तक्रार नोंदवली होती.

१५ तासांचा दुर्लक्षित प्रवास:
धक्कादायक बाब म्हणजे, दुपारी ४ वाजल्यापासून दुसऱ्या दिवशी सकाळी ७ वाजेपर्यंत शिंदे त्याच डब्यात बेशुद्ध पडून होते. ही लोकल रात्रभर अनेक फेऱ्या पूर्ण करून यार्डमध्ये तपासणीसाठीही गेली होती. यार्डमध्ये रेल्वे पोलीस आणि स्वच्छता कर्मचारी डब्यांची तपासणी करतात, मात्र कोणालाही डब्यात पडून असलेला हा प्रवासी दिसला नाही. अखेर दुसऱ्या दिवशी सकाळी ७ वाजता कल्याण स्थानकावर प्रवाशांना ते एका बाकाखाली आढळले.

पोलिसांवर गंभीर आरोप:
संजय शिंदे यांच्या कुटुंबीयांनी रेल्वे पोलिसांवर गंभीर आरोप केले आहेत. पोलिसांनी शिंदे यांना मद्यपी समजून मारहाण केल्याचा दावा नातेवाईकांनी केला आहे. त्यांच्या अंगावर मारहाणीच्या खुणा आढळल्याने खळबळ उडाली आहे. एका ज्येष्ठ नागरिकाला मदत करण्याऐवजी पोलिसांनी दाखवलेली ही अमानवीय वागणूक आता वादाच्या भोवऱ्यात सापडली आहे.

रेल्वे प्रशासनाचा तपास:
या घटनेची दखल घेऊन रेल्वे प्रशासनाने आता सीसीटीव्ही फुटेजची पडताळणी सुरू केली आहे. १५ तास एक व्यक्ती बेशुद्ध अवस्थेत ट्रेनमध्ये राहतेच कशी, असा सवाल आता उपस्थित केला जात आहे. पत्रकार संघटनांनी या प्रकरणी दोषी पोलीस आणि कर्मचाऱ्यांवर कडक कारवाई करण्याची मागणी केली आहे.