Over 10,000 Fake Birth Certificates Found in Mumbai Municipal Corporation!

मुंबई; महानगरपालिकेत खोट्या कागदपत्रांच्या आधारे८७,३४७ बनावट जन्म प्रमाणपत्रे तयार करण्यात आल्याचा गंभीर आरोप करण्यात आला होता. या आरोपांनंतर महापालिकेकडून या प्रमाणपत्रांची सखोल पडताळणी करण्यात आली, ज्यामध्ये १० हजारांहून अधिक जन्म प्रमाणपत्रे बोगस असल्याचे निष्पन्न झाले आहे.

या प्रकरणातील धक्कादायक बाब म्हणजे, ही प्रमाणपत्रे मिळवण्यासाठी आवश्यक असणारी आधार कार्ड आणि इतर महत्त्वाची कागदपत्रेच उपलब्ध नाहीत. संबंधित वॉर्डस्तरावरील विभागांकडेही अशी कोणतीही कागदपत्रे सादर झालेली नाहीत.

पुरावे नसतानाही ही प्रमाणपत्रे कशी तयार झाली आणि मूळ कागदपत्रे गहाळ झाली आहेत की जोडलीच गेली नाहीत, असा प्रश्न आता महापालिका प्रशासनाला पडला आहे. या घोटाळ्यात बांगलादेशी घुसखोरांचा सहभाग असल्याची शक्यताही व्यक्त केली जात आहे.

या गंभीर प्रकाराची दखल घेत महापौर रितू तावडे यांनी आरोग्य विभागातील काही जुन्या अधिकाऱ्यांच्या बदल्या करून नव्या नियुक्त्या करण्याचे निर्देश दिले होते. कागदपत्रांशिवाय आढळलेली ही १० हजारांहून अधिक प्रमाणपत्रे रद्द करण्याशिवाय आता महापालिकेकडे दुसरा पर्याय उरलेला नाही. त्यासाठी राज्य सरकारच्या रजिस्ट्रार जनरलकडे प्रस्ताव सादर केला जाणार आहे. तसेच, या संपूर्ण प्रकरणाच्या चौकशीसाठी विशेष तपास पथकाची (SIT) स्थापना देखील करण्यात आली आहे.