कोल्हापूर: मुलाच्या दारूच्या व्यसनाला कंटाळून बापानेच संपवलं; मिरवणुकीत अपघाताचा बनाव रचला, पण पोलिसांनी गुपित उघड केलं

कोल्हापूर: कोल्हापुरातील विक्रमनगर परिसरात एक धक्कादायक घटना उघडकीस आली आहे. दारूच्या नशेत सतत घरात शिवीगाळ आणि मारहाण करणाऱ्या पोटच्या मुलाचा जन्मदात्या बापानेच चाकूने भोसकून खून केला. त्यानंतर मुलाचा मृत्यू शिवजयंतीच्या मिरवणुकीत अपघातामुळे झाल्याचा बनाव वडिलांनी रचला, मात्र राजारामपुरी पोलिसांनी अवघ्या १२ तासांत या खुनाचा छडा लावून आरोपी वडिलांना जेरबंद केले.

नेमकी घटना काय?
मयत जुनेद गफूर पठाण (वय २१) हा भंगारच्या दुकानात कामाला होता, मात्र त्याला दारूचे प्रचंड व्यसन होते. तो दररोज नशेत घरात पत्नी आणि आई-वडिलांना त्रास द्यायचा. सोमवारी रात्री जुनेद पुन्हा दारू पिऊन आला आणि त्याने वडील गफूर पठाण यांना मारहाण करत जीवे मारण्याची धमकी दिली. या भांडणानंतर तो शिवजयंतीच्या मिरवणुकीत नाचण्यासाठी गेला. वडील त्याला ओढत घरी घेऊन आले, तिथे पुन्हा त्यांच्यात वाद झाला. संतापलेल्या वडिलांनी स्वयंपाकघरातील चाकूने जुनेदवर वार केले, ज्यात तो गंभीर जखमी झाला.

बापाचा फसलेला बनाव:
जुनेदला गंभीर अवस्थेत सीपीआर रुग्णालयात दाखल करण्यात आले. यावेळी वडिलांनी पोलिसांना सांगितले की, मिरवणुकीत नाचत असताना ट्रॉलीचा पत्रा लागून जुनेद जखमी झाला. मात्र, उपचारादरम्यान त्याचा मृत्यू झाला. जखमेचे स्वरूप पाहून डॉक्टरांना आणि पोलिसांना संशय आला. पोलिसांनी वडिलांना खाक्या दाखवताच त्यांनी रागाच्या भरात खून केल्याची कबुली दिली.

उद्ध्वस्त झालेलं कुटुंब:
या घटनेमुळे विक्रमनगर परिसरात मोठी खळबळ उडाली आहे. व्यसनाने एका तरुणाचा जीव घेतला, तर रागाच्या भरात केलेल्या कृत्यामुळे जन्मदाता बाप आता तुरुंगात गेला आहे. पठाण कुटुंबाचा कर्ता पुरुषच कोठडीत गेल्याने संपूर्ण कुटुंब आता रस्त्यावर आले आहे.