पुण्यात निवृत्त बड्या पोलीस अधिकाऱ्याचा कारनामा; जमिनीच्या आमिषाने व्यावसायिकाला अडीच कोटींना गंडवलं

पुणे: पुणे शहर आणि ग्रामीण पोलीस दलात वरिष्ठ पदावर कार्यरत राहिलेल्या एका निवृत्त पोलीस अधिकाऱ्याने व्यावसायिकाची २ कोटी ५० लाख रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी निवृत्त पोलीस अधिकारी उत्तम कदम यांच्याविरोधात गुन्हा दाखल करण्यात आला आहे.

नेमकी घटना काय?
तक्रारदार व्यावसायिक आणि कदम यांची ओळख होती. कदम यांनी व्यावसायिकाला खेड तालुक्यातील बोरज येथील एका मोक्याच्या जमिनीचे आमिष दाखवले. ही १२ एकर जमीन मुंबईतील एका व्यावसायिकाची असून, ती खरेदी केल्यास भविष्यात मोठा आर्थिक नफा होईल, असे त्यांनी सांगितले.

कसा केला घोटाळा?
१. बनावट बँक खाती: कदम यांनी मुंबईतील मूळ जमीन मालकाच्या नावाने बनावट बँक खाते उघडले. तसेच सोलापूरमधील एका बँकेत खासगी कंपनीच्या नावे बनावट खाते तयार करून आरटीजीएस (RTGS) द्वारे पैसे स्वीकारले.
२. रोख रक्कमेची मागणी: जमिनीच्या व्यवहारासाठी तक्रारदाराकडून सुरुवातीला ५० लाख आणि २५ लाख रुपये घेतले. त्यानंतर खरेदीखताच्या नावाखाली १ कोटी ३५ लाख रुपये रोख स्वरूपात उकळले.
३.  प्रत्यक्षात जमिनीचा मालक जिवंत असतानाही, कदम यांनी त्याचा मृत्यू झाल्याचे खोटे सांगून व्यवहार पुढे ढकलला.

धमकावल्याचा आरोप:
काही काळानंतर जेव्हा व्यावसायिकाला संशय आला आणि त्यांनी आपले पैसे परत मागितले, तेव्हा कदम यांनी पैसे देण्यास टाळाटाळ केली. इतकेच नव्हे तर तक्रारदाराला धमकावण्यातही आले. अखेर आपली फसवणूक झाल्याचे लक्षात येताच व्यावसायिकाने पोलिसांत धाव घेतली. या घटनेमुळे पोलीस दलात एकच खळबळ उडाली आहे.