Pune : नगरसेवक-कार्यकर्त्यांच्या वाहनांमुळे पार्किंगवर ताण; सर्वसामान्य व मेट्रो प्रवाशांसाठी प्रवेशबंदी, महापालिकेबाहेर फक्त…

Pune : महापालिकेचे सभागृह अस्तित्वात आल्यानंतर नगरसेवकांची ये-जा वाढणार आहे. १६५ नगरसेवकांबरोबरच त्यांचे कार्यकर्तेही पालिकेत येणार आहेत. त्यामुळे पार्किंगची जागा कमी पडणार आहे. परिणामी, सर्वसामान्यांसाठीच्या पार्किंगवर गदा येणार असून त्यांना पालिकेबाहेर गाड्या लावाव्या लागतील. तर कर्मचाऱ्यांसाठीही पालिकेबाहेर पार्किंग व्यवस्था केली गेली आहे. दरम्यान, यावर तोडग्याचे प्रयत्न सुरू आहेत.

महापालिकेचे मुख्यालय शिवाजीनगर येथे आहे. येथून संपूर्ण शहराचा कारभार चालतो. आयुक्त, अतिरिक्त आयुक्तांसह विभागप्रमुख याच ठिकाणी बसतात, तर लोकनियुक्त प्रतिनिधीही याच ठिकाणाहून कारभार करतात. त्यामुळे दररोज शेकडो नागरिक कर, परवाने, तक्रारी, दाखले आदी कामांसाठी महापालिकेत येत असतात. याशिवाय या इमारतीत सुमारे एक हजार अधिकारी-कर्मचारी कार्यरत असतात.

Maharashtra Weather : हवामानात सतत चढ-उतार; मुंबईत हवेची गुणवत्ता घसरली, राज्यात पुढील दिवसांत कसं असेल वातावरण?

कोणासाठी पार्किंग व्यवस्था उपलब्ध?
महापालिकेच्या मुख्य जुन्या इमारतीत हिरवळीलगत चारचाकी वाहनांसाठी पार्किंग आहे, तर दुचाकींसाठी मोजके पार्किंग उपलब्ध आहे. याशिवाय याच परिसरात दुमजली पार्किंग उभारण्यात आले आहे. त्यात खालील बंदिस्त भागात अधिकाऱ्यांची चारचाकी वाहने पार्क केली जातात. उर्वरित जागेत कर्मचाऱ्यांची दुचाकी वाहने पार्क केली जातात. याशिवाय नव्या विस्तारित इमारतीच्या तळघरात दुमजली पार्किंगची व्यवस्था आहे. तिथे सर्वांत खाली चारचाकींसाठी तर वरच्या मजल्यावर दुचाकींच्या पार्किंगसाठी जागा आहे; परंतु अनेकदा मेट्रोने प्रवास करणारे प्रवासी येथे वाहन लावून जातात, तर अनेकदा विविध कामांसाठी येणारे इथे वाहन लावून जातात. त्यामुळे पार्किंग व्यवस्था कमी पडत असल्याचे चित्र आहे. त्यामुळेच महापालिकेचा सुरक्षा विभाग आणि भवन विभागाच्या संयुक्त निर्णयानुसार पार्किंग व्यवस्थेत बदल करण्यात आल्याचे सांगण्यात येत आहे.

रस्ताच बंद करण्याचा विचार
महापालिकेची सर्वसाधारण सभा असली, की महापालिकेच्या जुन्या इमारतीच्या प्रवेशद्वारासमोरील रस्त्यावर चारचाकींचे दुहेरी तिहेरी पार्किंग केले जाते. त्यामुळे काँग्रेस भवन रस्त्याकडून महापालिका भवनाकडून शिवाजीनगर न्यायालयाकडे जाणारा रस्ता वाहतुकीसाठी बंद करण्याचाही विचार केला जात असल्याचे समजते. संभाव्य प्रतिक्रियांचा विचार करून याबाबतचा निर्णय घेतला जाणार असल्याची चर्चा आहे.