Pune : पुण्यात धक्कादायक प्रकार! स्टिंगच्या बहाण्याने महिलेचं अश्लील चित्रीकरण, पत्रकारासह चौघांवर गुन्हा

Pune : शहरातील मध्यवर्ती बुधवार पेठ परिसरात एका महिलेचे परवानगीशिवाय अश्लील स्वरूपाचे व्हिडिओ चित्रीकरण केल्याच्या गंभीर आरोपात एका वृत्तवाहिनीच्या पत्रकार रोहन राजेंद्र कदम (वय २८, रा. गांधी चौक, ता. पुरंदर, वाल्हे) याच्यावर विश्रामबाग पोलीस ठाण्यात विनयभंगाचा गुन्हा नोंदवण्यात आला आहे.

पीडित महिलेने दिलेल्या तक्रारीनुसार, रोहन कदम याने ‘स्टिंग ऑपरेशन’च्या बहाण्याने तिच्या परवानगीशिवाय मोबाइलमध्ये अश्लील व्हिडिओ रेकॉर्ड केला. या प्रकरणी चार दिवसांपूर्वी घटना घडल्यानंतर परिसरात मोठी खळबळ उडाली होती. पीडितेने लगेच पोलिसांकडे तक्रार दाखल केली. पोलिसांनी प्राथमिक चौकशी केल्यानंतर रोहन कदम याच्यासह त्याच्या तीन सहकाऱ्यांविरुद्ध गुन्हा दाखल केला आहे.

वरिष्ठ पोलिस अधिकाऱ्यांनी सांगितले की, तक्रारीची दखल घेत तपास सुरू असून, आरोपींच्या शोध आणि पुराव्यांचा संकलन वेगाने चालू आहे. या प्रकारामुळे महिलांच्या सुरक्षेच्या मुद्द्यावर पुन्हा एकदा चर्चा सुरू झाली आहे.

पत्रकार संघाची भूमिका कठोर
दरम्यान, पुणे श्रमिक पत्रकार संघाने या प्रकरणी स्पष्ट भूमिका घेतली आहे. संघाचे म्हणणे आहे की, “या प्रकरणातील पत्रकारांवर कठोर कारवाई व्हावी. कोणालाही पाठीशी घालू नये. अशा कृत्याचे आम्ही कोणत्याही प्रकारे समर्थन करत नाही.” संघाने पत्रकारितेच्या नावाखाली होणाऱ्या अशा गैरवर्तनाचा निषेध केला आहे.

नागरिकांनीही अशा घटनांवर तत्काळ आणि कठोर कारवाई करण्याची मागणी केली आहे. पोलिसांकडून पुढील तपास सुरू असून, लवकरच आरोपींना अटक होण्याची शक्यता वर्तवली जात आहे.