Satara :: साताऱ्यात DRI ची मोठी कारवाई, एमडी ड्रग्जच्या फॅक्टरीवर धाड, 6000 कोटींचे ड्रग्ज जप्त

Satara : महसूल गुप्तचर संचालनालयाने (DRI) सातारा जिल्ह्यात केलेल्या कारवाईत तब्बल 6000 कोटींचे एमडी ड्रग्ज जप्त केल्याची धक्कादायक माहिती समोर आली आहे. कराड तालुक्यातील पाचुपतेवाडी या गावातील मोकळ्या पोल्ट्री शेडवर तीन आयपीएस अधिकाऱ्यांच्या पथकाने धाड टाकली असता त्या ठिकाणी ड्रग्ज निर्मितीची फॅक्टरीच उघडकीस आली. याप्रकरणी एका सराईत गुन्हेगारासह काही जणांना ताब्यात घेण्यात आले असून बिहारी तरुणांकडून ड्रग्ज निर्मिती करून घेतली जात होती, असे समजते.

कराड तालुक्यातील डोंगरी भागात पाचुपतेवाडी हे गाव आहे. कराड ग्रामीण पोलीस ठाण्याच्या हद्दीतील पाचुपतेवाडी गावामध्ये एमडी ड्रग्ज तयार करणारी फॅक्टरीच सुरू होती. गावापासून काही अंतरावर असलेल्या मोकळ्या पोल्ट्री शेडमध्ये ड्रग्ज निर्मिती केली जात होती. याबद्दल मिळालेल्या माहितीवरून डीआरआयच्या तीन वरिष्ठ अधिकाऱ्यांचा समावेश असलेल्या पथकाने शनिवारी सायंकाळी धाड टाकली.

Pune : विवाहित नम्रता शाहरूखसोबत लिव्ह-इनमध्ये; दागिने घेण्याच्या बहाण्याने नवऱ्याने दोघांना बोलावलं आणि पुढे घडलेल्या प्रकाराने पुणे हादरलं

शेडमध्ये एमडी ड्रग्ज आणि कच्चा माल जप्त करण्यात आला. तसेच संशयितांना ताब्यात घेऊन पोल्ट्री शेड सील करण्यात आले आहे. जप्त करण्यात आलेल्या ड्रग्जची किंमत सहा हजार कोटी रूपये असल्याचे सांगितले जात आहे.

घटनास्थळावरून मिळालेल्या प्राथमिक माहितीनुसार, रेकॉर्डवरील एका अट्टल गुन्हेगाराने काही बिहारी तरूणांना हाताशी धरून रिकाम्या पोल्ट्री शेडमध्ये अंमली पदार्थांचे उत्पादन सुरू केले होते. पत्र्याच्या शेडला बाजूने लोखंडी जाळी आहे. शेडमध्ये काय चाललंय हे बाहेरून दिसू नये म्हणून जाळीला प्लास्टिकचा कागद बांधण्यात आला आहे. शेडमध्ये अत्यंत गुप्तपणे ड्रग्ज निर्मिती केली जात होती. घटनेपासून काही अंतरावर कराड ग्रामीण पोलीस ठाण्याचे दूरक्षेत्र आहे. मात्र, स्थानिक पोलिसांना त्याचा कसलाही सुगावा नव्हता. डीआरआयच्या वरिष्ठ अधिकाऱ्यांनी शनिवारी सायंकाळी छापा टाकून ड्रग्ज निर्मितीची फॅक्टरी उध्वस्त केली. या कारवाईची माहिती देखील सातारा जिल्हा पोलीस अथवा कराड ग्रामीण पोलिसांना नव्हती.

सध्या महसूल गुप्तचर संचालनालयाकडून (डीआरआय) या प्रकरणाचा तपास सुरू आहे. या ड्रग्ज निर्मिती रॅकेटमध्ये आणखी कोणाचे हात गुंतले आहेत का? हे तपासात स्पष्ट होईल‌ मात्र, या धडक कारवाईमुळे ड्रग्ज निर्मिती करणाऱ्या माफियांचे धाबे दणाणले आहेत. पोलिसांना देखील या कारवाईने मोठी चपराक बसली आहे. जिल्ह्यातील पोलीस अधिकारी किरकोळ कारवाया करून स्वतःची पाठ थोपटून घेतात. परंतु, अंमली पदार्थ निर्मितीची फॅक्टरी सुरू असल्याचा सुगावा त्यांना लागला नाही. यावरून सातारा पोलीस दल सोशल मीडियावर ट्रोल होत आहे.

यासंदर्भात कराडच्या डीवायएसपी राजश्री पाटील यांच्याशी संपर्क साधला असता त्या म्हणाल्या की, कारवाई बद्दल आम्हाला कसलीच कल्पना दिलेली नाही. त्यामुळे कारवाईत नेमकं काय सापडले हे आम्हाला माहीत नाही. तसेच, कराड ग्रामीणचे पोलीस निरीक्षक महेंद्र जगताप यांनी देखील कारवाईबद्दल माहिती नसल्याचे सांगितले. यामुळे एकूणच सातारा जिल्हा पोलीस दलाची नाचक्की झाली आहे.