Pune : डेटिंग ॲपवर तरुणाशी ओळख; पुण्यातील युवक भुलला, कोंढव्याच्या पेट्रोल पंपावर बोलावून चौघांनी मिळून लुटलं

Pune : डेटिंग ॲपवर झालेल्या ओळखीतून एका तरुणाला बोलावून त्याच्याकडील दागिने आणि रोकड असा सुमारे ८० हजार रुपयांचा ऐवज लुटण्यात आल्याची घटना कोंढवा परिसरात घडली. या प्रकरणी चोरट्यांविरुद्ध गुन्हा दाखल करण्यात आला आहे. या प्रकरणी चौघांना अटक करण्यात आली आहे.

राहिल अकिल शेख (वय १९, रा. सोमजी, कोंढवा), शाहीद शानूर मोमीन (वय २५, रा. कात्रज), रोहन नईम शेख (वय १९, रा. कोंढवा बु.), इशान निसार शेख (वय २५, रा. कात्रज) अशी अटक केलेल्यांची नावे आहेत.

Pune : लग्नात ५५ तोळे सोनं आणि फॉर्च्युनर; अतिरिक्त १०० तोळ्यांसाठी छळ, पुण्यात शिवसेना नेत्याच्या सुनेवर गंभीर आरोप, कोर्टाने फटकारलं

काय घडलं नेमकं?
याबाबत एका तरुणाने कोंढवा पोलिस ठाण्यात तक्रार दिली आहे. पोलिसांनी दिलेल्या माहितीनुसार, तक्रारदार २७ वर्षीय तरुण नगर रस्त्यावरील वाघोली परिसरात राहतो. तो ११ जानेवारीला मोबाइलवर एक डेटिंग ॲप पाहत असताना एका अनोळखी व्यक्तीने त्याला मेसेज पाठविला. त्यानंतर तक्रारदाराने त्या व्यक्तीच्या मोबाइलवर संपर्क साधला.

‘कोठे राहतो,’ अशी विचारणा आरोपीने केली. यानंतर आरोपीने रात्री नऊच्या सुमारास कोंढव्यातील शीतल पेट्रोल पंपाजवळ भेटायला बोलावले. तेथे तीन तरुण थांबले होते. त्यांनी तक्रारदाराला धारदार हत्याराचा धाक दाखविला. त्यानंतर कोंढव्यातील पानसरेनगर परिसरातील मोकळ्या जागेत त्याला नेले. तेथे त्याला शिवीगाळ करून लाथाबुक्क्यांनी मारहाण करण्यात आली.

आरोपींनी त्याच्याकडील मोबाइल आणि अंगठी काढून घेतली; तसेच धमकावून एटीएममधून पैसे काढण्यास भाग पाडले. तक्रारदाराकडील एकूण सुमारे ८० हजार रुपयांचा ऐवज लुटण्यात आला. या घटनेची वाच्यता केल्यास जीवे मारण्याची धमकी देऊन आरोपी पसार झाले होते. पोलिसांनी तपास करून आरोपींना अटक केली.