Saptashrungi Devi Darshan

Nashik : सप्तशृंगगड ते नांदुरी या मार्गावर रस्त्याचे व्हाइट टॅपिंग तसेच व्हॅली साइड रिटेनिंग वॉलचे काम सुरू आहे. त्यामुळे वाहतूक सुरळीत ठेवण्यासह सुरक्षिततेच्या दृष्टीने आजपासून (दि. १३) ते १५ मार्चपर्यंत सप्तशृंगगड ते नांदुरी रस्त्यावर एकेरी वाहतूक व्यवस्था लागू करण्यात येणार आहे. याबाबतचे आदेश सहायक जिल्हाधिकारी तथा उपविभागीय अधिकारी (कळवण) डॉ. कश्मिरा संखे यांनी सोमवारी (दि.१२) काढले आहेत.

हा रस्ता डोंगराळ भागातून जातो. रस्त्याची मर्यादित रुंदी, तीव्र वळणे आणि चढ-उतारामुळे काम सुरू असताना येथे दुहेरी वाहतूक करणे तांत्रिकदृष्ट्या शक्य नाही. रस्त्याचे काम दर्जेदार व सुरक्षित होण्यासाठी काँक्रिट टाकल्यानंतर आवश्यक क्युअरिंग कालावधी पूर्ण होणे गरजेचे आहे. याशिवाय काम सुरू असणाऱ्या कालावधीत कोणत्याही प्रकारची वाहतूक सुरू ठेवल्यास रस्त्याच्या गुणवत्तेवर विपरीत परिणाम होण्याची शक्यता असल्याने वाहतुकीवर निर्बंध घालण्यात आले आहेत. सण-उत्सवांच्या काळात भाविकांची व वाहनांची मोठ्या प्रमाणात गर्दी होत असल्याने वाहतूक कोंडी निर्माण होण्याचा धोका लक्षात घेऊन हा निर्णय घेण्यात आला आहे.

BMC Election : मुंबईत आजपासून वाहतूक बदल; सायन, मालाड परिसरातील रस्ते बंद, वाहनांना वळणमार्ग

या मार्गावर नियंत्रित वेळापत्रकानुसार वाहतूक सोडण्यात येणार आहे. नांदुरीकडे आणि नांदुरीहून सप्तशृंगगडाकडे जाणारी वाहतूक ठराविक वेळेच्या अंतराने सुरू राहणार आहे. रुग्णवाहिका, अग्निशमन वाहन, पोलिस वाहने, दैनंदिन आपत्कालीन सेवा, शालेय विद्यार्थ्यांच्या बसेसला परिस्थितीनुसार तत्काळ मार्ग मोकळा करून देण्यात येणार आहे. सप्तशृंगगड ट्रस्ट, ग्रामपंचायत सप्तशृंगगड व संबंधित यंत्रणांनी परस्पर समन्वय साधून शिस्तबद्ध व सुरक्षित पद्धतीने वाहतूक नियंत्रण करावे, असेही आदेशात नमूद केले आहे. प्रवास कालावधी हा ३० मिनिटांचा आहे. प्रत्येक सत्रानंतर ३० मिनिटे प्रवास पूर्ण होण्यासाठी क्लिअर टाइम असणार आहे. एका वेळी फक्त एकाच दिशेने वाहतूक सुरू राहील व गाडी पोहचेपर्यंत विरूद्ध दिशेची वाहतूक थांबलेली असेल, असे आदेशात नमूद आहे.

असे असेल वेळापत्रक
सकाळ सत्र : नांदुरी ते सप्तशृंगगड - सकाळी ६ ते ६.३० ८ ते ८.३०, १० ते १०.३०, सप्तशृंगगड ते नांदुरी - सकाळी ७ ते ७.३०, ९ ते ९.३०, ११ ते ११.३०
दुपार सत्र : नांदुरी ते सप्तशृंगगड - दुपारी १२ ते १२.३०, २ ते २.३० सप्तशृंगगड ते नांदुरी - दुपारी १ ते १.३०, ३ ते ३.३०
सायंकाळ सत्र : नांदुरी ते सप्तशृंगगड - ४ ते ४.३०, ६ ते ६.३०, ८ ते ८.३० व १० ते १०.३०, सप्तशृंगगड ते नांदुरी - ५ ते ५,३०, ७ ते ७.३०, ९ ते ९.३०, ११ ते ११.३०
रात्र सत्र : नांदुरी ते सप्तशृंगगड - रात्री १२ ते १२.३०, २ ते २.३०, ४ ते ४.३०, सप्तशृंगगड ते नांदुरी - रात्री १ ते १.३०, ३ ते ३.३०, ५ ते ५.३०