Pune Crime : मैत्रिणीच्या घरी मेजवानी, बोलता बोलता विषय भरकटला; कोंढव्यात थरारक घटना!

Pune : प्रेमप्रकरणातून झालेल्या वादातून नायजेरियन तरुणाला लाथाबुक्क्यांनी बेदम मारहाण करून त्याचा खून करण्यात आला. ही घटना कोंढव्यातील पिसोळी परिसरात घडली. या प्रकरणी काळेपडळ पोलिसांनी दोन नायजेरियन तरुणांना ताब्यात घेतले असून, इतर साथीदारांचा शोध सुरू आहे.

काय घडलं?
येमेका क्रिस्टीएन (वय ४०, सध्या रा. फुरसुंगी, मूळ रा. नायजेरिया) असे मृत तरुणाचे नाव आहे. नायेमेका मदुबची ओनिओ आणि किन्सली ओबा (दोघेही रा. लिमरास हाइट सोसायटी, पद्मावतीनगर, पिसोळी, मूळ रा. नायजेरिया) यांना ताब्यात घेतले आहे. त्यांच्या इतर साथीदारांविरुद्ध गुन्हा दाखल केल्याची माहिती काळेपडळ पोलिस ठाण्याचे वरिष्ठ पोलिस निरीक्षक मानसिंग पाटील यांनी दिली.

Nashik : सप्तशृंगी देवी दर्शनासाठी प्रवास? 15 मार्चपर्यंत गडावर वाहतुकीत मोठे बदल; जाणून घ्या पर्यायी मार्ग

पोलिसांनी दिलेल्या माहितीनुसार, पिसोळीतील नायजेरियन महिलेने सोमवारी (१२ जानेवारी) मित्रांना जेवायला घरी बोलावले होते. त्या वेळी येमेका क्रिस्टीएन, किन्सली, ओबी, ओजे ओजगवा आणि नायेमेका मादूबुची ओनिया हे तिच्या घरी आले होते. जेवणादरम्यान प्रेमप्रकरणातून क्रिस्टीएन आणि इतरांमध्ये वाद झाला. वादाचे रुपांतर हाणामारीत झाले. त्यात किन्सली, ओबी, नायेमेका मादूबुची ओनिया आणि ओजे ओजगवा यांनी क्रिस्टीएनला लाथाबुक्क्यांनी बेदम मारहाण केली.

गंभीर जखमी अवस्थेत क्रिस्टीएनला त्याचा मित्र गिफ्ट सिव्होनस ऊटाह (वय ३९, रा. वडाचीवाडी, उंड्री) याने वानवडीतील खासगी रुग्णालयात दाखल केले. मात्र, उपचारांदरम्यान त्याचा मृत्यू झाल्याचे डॉक्टरांनी सांगितले.

घटनेची माहिती मिळताच वरिष्ठ पोलिस निरीक्षक मानसिंग पाटील यांनी घटनास्थळी भेट देऊन तपास सुरू केला. पोलिसांनी ओनिओ आणि किन्सली ओबा यांना ताब्यात घेतले. उर्वरित आरोपींचा शोध सुरू आहे. प्रेमसंबंधातून हा प्रकार घडल्याचा प्राथमिक अंदाज आहे.