Pune Mumbai Journey : पुणे-मुंबई प्रवास आता ९० मिनिटांत ! नवीन द्रुतगती मार्गाच्या 'डीपीआर'ला मंजुरी

Pune : पुण्याहून मुंबईला अवघ्या ९० मिनिटांत पोहोचणे शक्य होणार आहे. कारण राष्ट्रीय महामार्ग प्राधिकरण (एनएचएआय) पुणे-मुंबईदरम्यान नवीन द्रुतगती महामार्ग बांधणार आहे. त्याच्या सविस्तर प्रकल्प अहवालाला (डीपीआर) नुकतीच मंजुरी मिळाली असून, सहा महिन्यांत हा 'डीपीआर' पूर्ण करण्याचे उद्दिष्ट ठेवण्यात आले आहे.

नवीन द्रुतगती मार्गासाठी सुमारे १५ हजार कोटी रुपयांचा खर्च अपेक्षित असून, दिवसाला किमान अडीच ते तीन लाख वाहने या मार्गावरून सहजरित्या धावू शकतील, अशी याची क्षमता असणार आहे. हा मार्ग मुंबईतील अटल सेतूला आणि पुण्याच्या वर्तुळाकार रस्त्याला (रिंगरोड) जोडला जाणार आहे. परिणामी केवळ मुंबई-पुणेच नव्हे, तर मुंबई-बंगळूर हा प्रवासदेखील गतिमान होणार आहे.

Maharashtra Politics : पुण्यात राजकीय भूकंप; पालिका निवडणुकांपूर्वी उद्धव ठाकरेंना मोठा धक्का, बड्या नेत्याचा भाजपकडे कल

पुणे-मुंबईदरम्यान सध्या अस्तित्वात असलेल्या द्रुतगती मार्गावर वाहनांची संख्या वाढल्याने वाहतूक कोंडी आणि अपघाताचे प्रमाण वाढले आहे. पुण्याहून मुंबईला जाण्यासाठी किमान अडीच ते तीन तासांचा वेळ लागतो.

अपघात अथवा दरडी कोसळल्यानंतर मोठ्या प्रमाणात वाहतूक कोंडी होते. वाहनधारक तासनतास अडकून पडतात. परिणामी पुणे-मुंबईदरम्यान प्रवासाचा वेळ वाया जातो. हे टाळण्यासाठीच आता 'एनएचएआय' नवीन द्रुतगती मार्ग बांधणार आहे.

अटल सेतू ते पुणे 'रिंगरोड' असा हा मार्ग असणार आहे. याची सुरुवात मुंबईतील अटल सेतू जवळून सुरू होईल. तिथून तो नवी मुंबई विमानतळ आणि जेएनपीटी बंदराला जोडला जाईल. पुढे सह्याद्रीच्या डोंगर रांगांमधून बोगदे आणि पुलांच्या साह्याने हा मार्ग पुण्यातील शिवरे (ता. भोर) येथे संपेल, जिथे तो प्रस्तावित पुणे 'रिंगरोड'ला जोडला जाईल. परिणामी सातारा, कोल्हापूर, बंगळूरला जाणाऱ्या वाहनासाठी पुण्यात येण्याची आवश्यकता नाही. त्यामुळे पुण्यात दाखल होणाऱ्या विशेषतः जड वाहनांची संख्या कमी होणार आहे.

नवीन द्रुतगती मार्ग ८ मार्गिकांचा असणार

चार मुंबईच्या दिशेने जाणाऱ्या, चार पुण्याच्या दिशेने येणाऱ्या मार्गावर असणार

आठ मार्गिकवरून तासाला १२ हजार वाहने धावू शकतील

दिवसाला किमान पावणे तीन लाख वाहने सहजरित्या धावतील

सुमारे १५ हजार कोटी रुपयांचा खर्च अपेक्षित

पुणे-मुंबईदरम्यान आणखी एक द्रुतगती मार्ग होणार आहे. पुणे-बंगळूर 'ग्रीनफिल्ड कॉरिडॉर'चा हा भाग असणार आहे. या मार्गाच्या 'डीपीआर'ला मंजुरी मिळाली असून, लवकरच याच्या कामाला सुरुवात होईल. काम सुरू झाल्यानंतर तीन वर्षात मार्ग तयार करण्याचे उद्दिष्ट आहे.

- संजय कदम, प्रकल्प संचालक, राष्ट्रीय महामार्ग प्राधिकरण, पुणे