Pune : पुणे पोलीस दलात खळबळ! ऑन ड्युटी पोलिसाकडून ठाण्याच्या आवारात महिलेला धडक; तात्काळ निलंबन

Pune : पुण्याच्या पोलीस दलातून गेल्या काही दिवसांत खळबळजनक घटना समोर आल्या आहेत. महिला प्राचार्याकडून 3 पोलिसांनी खंडणी उकळल्याचं प्रकरण आणि आयटी क्षेत्रातील तरुण तरुणीला धमकी देत पैसे घेतल्याचं प्रकरण ताजं असतानाच आता आणखी एक घटना समोर आली आहे. आता खाकी वर्दीची शिस्त धाब्यावर बसवून मद्यधुंद अवस्थेत गैरवर्तन करणाऱ्या काळेपडळ पोलीस ठाण्यातील दोन हवालदारांना पोलीस उपायुक्त डॉ. राजकुमार शिंदे यांनी तडकाफडकी निलंबित केले आहे. सचिन सुरेशराव जाधव आणि संजय अंकुश कराड अशी निलंबन करण्यात आलेल्या कर्मचाऱ्यांची नावे आहेत.

पोलीस ठाण्याच्या आवारातच अपघात
यातील पहिल्या घटनेत, हवालदार संजय कराड यांनी तर मर्यादेचा कळस गाठला. त्यांनी थेट पोलीस ठाण्याच्या आवारातच मद्यप्राशन करून गाडी चालवली. इतकंच नाही तर, नशेत गाडीवरील ताबा सुटल्याने त्यांनी पोलीस ठाण्यात आलेल्या एका महिला तक्रारदाराला उडवलं. पोलीस ठाण्यासारख्या सुरक्षित ठिकाणीच आणि विशेष म्हणजे पोलिसाकडूनच हा असा प्रकार घडल्याने आश्चर्य व्यक्त केलं जात आहे.

पोलीस भरतीच्या बंदोबस्तात नशा
दुसऱ्या प्रकरणात २१ मार्च रोजी लोणी काळभोर येथील एमआयटी (एडीटी) विद्यापीठात 'पुणे शहर पोलीस भरती २०२४-२५' ची लेखी परीक्षा सुरू होती. हा अत्यंत संवेदनशील बंदोबस्त असताना हवालदार सचिन जाधव यांची नियुक्ती सेक्टर १ मध्ये होती. वरिष्ठ पोलीस निरीक्षकांनी अचानक तपासणी केली असता, जाधव हे मद्यधुंद अवस्थेत गैरवर्तन करताना आढळले. भरती प्रक्रियेच्या गांभीर्याला हरताळ फासल्याने त्यांच्यावर निलंबनाची कुऱ्हाड कोसळली आहे

पोलीस उपायुक्तांनी या दोन्ही प्रकरणांची गंभीर दखल घेत 'ऑन ड्युटी' मद्यपान करून खाकीची प्रतिमा मलीन करणाऱ्या या कर्मचाऱ्यांना घरी बसवण्याचे आदेश दिले आहेत.