Pune : पुणे हादरलं! आईनेच ओलांडली क्रूरतेची सीमा; बाथरूममधील दृश्य पाहून पोलीसही हादरले

Pune : पुणे जिल्ह्यातून एक अत्यंत धक्कादायक आणि संतापजनक घटना समोर आली आहे. प्रेमसंबंधात अडथळा ठरत असल्याच्या कारणावरून एका आईनेच आपल्या सहा वर्षांच्या मुलाची हत्या केल्याचा प्रकार उघडकीस आला आहे. या प्रकरणी चाकण पोलिसांनी निर्दयी आईला अटक केली असून तिचा प्रियकर सध्या फरार आहे.

मृत मुलाचे नाव आवेज मेहबूब शेख (वय ६) असे आहे. पोलिसांनी या प्रकरणी आई बसरीन मेहबूब शेख (वय २७, रा. कुरुळी) हिला अटक केली आहे. तर, तिचा प्रियकर राम विनायक कजेवाड हा अद्याप पसार असून त्याचा शोध सुरू आहे.

बाथरूममध्ये नेऊन गळा दाबून हत्या

मिळालेल्या माहितीनुसार, बसरीन आणि तिचा प्रियकर राम यांच्या प्रेमसंबंधात लहानगा आवेज अडथळा ठरत होता. त्यामुळे दोघांनी मिळून त्याला संपवण्याचा कट रचला. त्यांनी मुलाला बाथरूममध्ये नेले आणि त्याचा छळ करत गळा दाबून त्याची हत्या केली. या घटनेने माणुसकीलाच काळिमा फासला आहे.

मृत्यूचा बनाव करण्याचा प्रयत्न

हत्या केल्यानंतर पुरावे नष्ट करण्यासाठी आरोपींनी आवेजचा मृतदेह ‘इर्टिका’ कारमधून बीड जिल्ह्यातील धर्मापुरी येथे नेला. तिथे मुलाचा नैसर्गिक मृत्यू झाल्याचा बनाव रचण्याचा प्रयत्न करण्यात आला. मात्र, मुलाच्या मृत्यूबाबत संशय आल्याने इसाक शेख यांनी पोलिसांत तक्रार दाखल केली.

चौकशीत गुन्ह्याची कबुली

पोलिसांनी बसरीनला ताब्यात घेऊन कसून चौकशी केली असता, तिने गुन्ह्याची कबुली दिली. फरार आरोपी राम कजेवाड याच्या शोधासाठी पोलीस पथके रवाना करण्यात आली असून पुढील तपास सुरू आहे.

या घटनेमुळे कुरुळी परिसरात संतापाची लाट उसळली आहे. एका निष्पाप मुलाचा त्याच्याच आईने जीव घेतल्याने नागरिकांकडून तीव्र हळहळ व्यक्त केली जात आहे.