Chhatrapati Sambhajinagar Crime

Chhatrapati Sambhajinagar : वरिष्ठांकडून होत असलेल्या कथित छळाला कंटाळून MSRTC (एसटी महामंडळ) मधील एका कर्मचाऱ्याने आत्महत्या केल्याची धक्कादायक घटना समोर आली आहे. या घटनेमुळे सिल्लोड आगारासह संपूर्ण एसटी विभागात खळबळ उडाली असून, संतप्त कर्मचाऱ्यांनी काही काळ बस सेवा बंद ठेवून निषेध व्यक्त केला.

मृत कर्मचाऱ्याचे नाव शरद विठ्ठल भिवसने (वय ४०, रा. वैशाली नगर, सिल्लोड) असे आहे. ते सिल्लोड आगारात सहाय्यक वाहतूक निरीक्षक म्हणून कार्यरत होते. बुधवारी सकाळी ते नेहमीप्रमाणे कामावर हजर झाले; मात्र दुपारी सुमारे २ वाजता आर.एल. पार्क परिसरातील विहिरीत उडी घेऊन त्यांनी जीवन संपवले.

आत्महत्येपूर्वी सुसाईड नोट
आत्महत्येपूर्वी लिहिलेल्या चिठ्ठीत त्यांनी आपल्या मृत्यूला जबाबदार ठरवताना काही वरिष्ठ अधिकाऱ्यांची नावे नमूद केल्याची माहिती समोर आली आहे. यामध्ये डेपो मॅनेजर विजय काळवणे, वाहतूक निरीक्षक किरण अवसरमल आणि लिपिक विकास चव्हाण यांचा समावेश असल्याचे सांगितले जाते.

तिघांविरुद्ध गुन्हा दाखल
घटनेनंतर नातेवाईक आणि सहकाऱ्यांनी पोलीस ठाण्यात धाव घेतली. दोषींवर कारवाई केल्याशिवाय मृतदेह ताब्यात घेणार नाही, अशी भूमिका त्यांनी घेतली होती. अखेर पोलिसांनी तक्रारीची दखल घेत संबंधित तिघांविरुद्ध आत्महत्येस प्रवृत्त करणे तसेच अ‍ॅट्रॉसिटी कायद्यान्वये गुन्हा दाखल केला आहे.

मानसिक छळाचे आरोप
पोलीस तक्रारीनुसार, मृत कर्मचाऱ्याला गेल्या अनेक दिवसांपासून वरिष्ठांकडून मानसिक त्रास दिला जात होता. जातीवाचक शिवीगाळ, अपमानास्पद वागणूक आणि मुद्दाम त्रासदायक ड्युटी देण्याच्या धमक्या दिल्या जात असल्याचे आरोप आहेत. या सततच्या छळाला कंटाळून त्यांनी टोकाचे पाऊल उचलल्याचे सांगितले जात आहे.

बस सेवा ठप्प; प्रवाशांची गैरसोय
या घटनेच्या निषेधार्थ एसटी कर्मचाऱ्यांनी अचानक बस सेवा बंद पाडली. सुमारे २० बस फेऱ्या रद्द झाल्याने ग्रामीण भागातील प्रवाशांची मोठी गैरसोय झाली. गुन्हा दाखल झाल्यानंतर आंदोलन मागे घेण्यात आले असले, तरी कर्मचाऱ्यांमध्ये प्रशासनाविरुद्ध संताप कायम आहे.