Pune : पुण्यात जमीन घोटाळा प्रकरणी शीतल तेजवानीला अटक; पोलिसांच्या कारवाईत मोठा खुलासा

Pune : पुण्यातून आताच्या घडीची सर्वात मोठी बातमी समोर येत आहे. उपमुख्यमंत्री अजित पवार यांचे चिरंजीव पार्थ पवार यांच्या अमेडिया कंपनीच्या जमीन गैरव्यवहार प्रकरणी मोठी कारवाई करण्यात आली आहे. या प्रकरणी गुन्हे शाखेकडून शीतल तेजवानी हिला अटक करण्यात आली आहे. पार्थ पवार यांच्या कंपनीला शीतल तेजवानी हिने बेकायदेशीरपणे जमीन विक्री केल्याचा आरोप आहे. आर्थिक गुन्हे शाखेने या प्रकरणी अखेर शीतल तेजवानी हिला अटक केली आहे.

पुण्याच्या कोंढवाच्या कोरोगाव आयटी पार्क येथील जमीन पार्थ पवार यांच्या अमेडिया कंपनीने खरेदी केली होती. संबंधित जमिनीच्या पॉवर ऑफ अॅटर्नी शीतल तेजवानी या होत्या. त्यांनी पॉवर ऑफ अॅटर्नीचा वापर करुन शासकीय जमीन एका खासगी कंपनीच्या नावावर केली होती. आर्थिक गुन्हे शाखेने शीतल तेजवानी हिला दोन वेळा चौकशीसाठी बोलावलं होतं. तिची चौकशी देखील झाली होती.

Maharashtra Politics : उद्धव ठाकरेंकडून शिंदे गटाला बालेकिल्ल्यात धक्का; अनेक बडे नेते शिवसेनेत दाखल

शीतल तेजवानी हिच्याकडे पोलिसांनी वारंवार कागदपत्रांची मागणी करुनही ओरिजनल कागदपत्रे सादर केले जात नव्हते. त्यामुळे शीतल तेजवानी हिने शासनाची फसवणूक केल्याचं पोलिसांच्या तपासात उघड झाल्याचं बोललं जात आहे. शीतल तेजवानी हिने खोट्या कागदपत्रांचा वापर करुन पॉवर ऑफ अटर्नी बनवण्यात आली. त्यातून शासकीय जमीन खासगी कंपनीला विक्री करण्यात आली.

या प्रकरणात शीतल तेजवानी हिची दोन वेळा चौकशी झाली होती. त्यापैकी एकेदिवशी साडेचार तास कसून चौकशी झाली होती. पोलिसांनी सखोल तपास केल्यानंतर आता शीतल तेजवानी हिला अटक केली आहे. शीतल तेजवानीच्या अटकेनंतर आता या प्रकरणात काय-काय माहिती समोर येते? ते पाहणं महत्त्वाचं आहे.