Pune : धावपट्टीलगत बिबट्याचे हालचाली; सुरक्षा वाढवण्यासाठी विमानतळ प्रशासन–वन विभागाची तातडीची बैठक, परिसरात अतिरिक्त कॅमेरे बसवण्याचा निर्णय

Pune : पुणे विमानतळाच्या धावपट्टीजवळ बिबट्याचा वावर आढळून आल्यानंतर सर्व यंत्रणा सतर्क झाल्या आहेत. परिस्थितीचे गांभीर्य लक्षात घेऊन सोमवारी (ता. २४) विमानतळ प्रशासनासोबत वन विभागाच्या अधिकाऱ्यांची बैठक होणार आहे.

वन विभागाकडून आवश्यक ते उपाय योजिले जात आहेत. ट्रॅप कॅमेऱ्यांची संख्या वाढविण्यावर भर दिला जात आहे. धावपट्टीजवळ पूर्वी तीन ठिकाणी ट्रॅप कॅमेरे लावले होते. रविवारी त्यात वाढ झाली आहे.

रविवारी आणखी सात कॅमेरे लावल्याची माहिती आहे. शिवाय हवाई दलाच्या अधिकाऱ्यांना ज्या ठिकाणी सुरक्षा भिंतीची पडझड झाली आहे, त्या ठिकाणी आवश्यक ते उपाय योजण्यास सांगितले आहे.

दरम्यान, विमानतळ प्रशासनाने 'ग्राउंड स्टाफ'ची कामे करणाऱ्या कर्मचाऱ्यांना सतर्क राहण्याच्या सूचना दिल्या आहेत. 'टॅक्सी वे'वर काम करणाऱ्या कर्मचाऱ्यांनी रात्रीच्या वेळी एकट्याने जाऊ नये, खाली वाकून कामे करू नये, अशा सूचना दिल्या आहेत. कामे करताना सुरक्षेसाठी केंद्रीय औद्योगिक सुरक्षा दलाच्या (सीआयएसएफ) जवानांची मदत घेण्याची सूचना करण्यात आली आहे.

Delhi : न्यायमूर्ती सूर्यकांत यांची सरन्यायाधीशपदी निवड; सामान्य कुटुंबातून देशाच्या सर्वोच्च न्यायासनापर्यंतचा प्रेरणादायी प्रवास

पुणे विमानतळाच्या धावपट्टीजवळ (टॅक्सी वे के ४) तीन वेळा बिबट्या आढळून आला. रात्रीच्या दीड ते दोनच्या सुमारास बिबट्या 'टॅक्सी वे'जवळ येत आहे. यामुळे कर्मचाऱ्यांमध्ये भीतीचे वातावरण निर्माण झाले आहे.

धावपट्टीजवळ ट्रॅप कॅमेऱ्यांची संख्या वाढविण्यात आली आहे. आम्ही बिबट्याचा शोध घेत आहोत. कॅमेऱ्यांची संख्या वाढविल्याने निश्चितच त्याचा फायदा होईल. आवश्यकता असल्यास आणखी उपाययोजना केल्या जातील.

आशिष ठाकूर, मुख्य वन संरक्षक, पुणे प्रदेश