Mumbai: डॉक्टर महिलेला अपमानास्पद वागणूक; राज्य महिला आयोगाची सर जे जे समूह रुग्णालयावर कारवाई

Mumbai : डॉक्टर महिला आणि स्त्रीरोग व प्रसुतिशास्त्र विभागातील प्राध्यापिकेच्या तक्रारीकडे दुर्लक्ष करणं जेजे रुग्णालयाला महागात पडलंय. राज्य महिला आयोगानं दखल घेत रुग्णालयाला नोटीस बजावलीय. सर जे जे समूह रुग्णालयाच्या स्त्रीरोग व प्रसुतिशास्त्र विभागातील प्राध्यापिका आणि डॉक्टर महिलेने विभागप्रमुखाविरोधात तक्रार दाखल केली होती. त्यावर काही कारवाई न झाल्यानं महिला आयोगानं संताप व्यक्त केलाय.

महिला डॉक्टरनं विभागप्रमुखाकडून त्यांना होत असलेल्या सततच्या मानसिक त्रास आणि अपमानास्पद वागणुकीबाबत महाराष्ट्र राज्य महिला आयोगाकडे १० जुलै २०२५ रोजी तक्रार दाखल केली होती. या तक्रारीच्या अनुषंगाने आयोगाने रुग्णालय प्रशासनाकडून दोनवेळा, दिनांक १८ जुलै २०२५ आणि २४ ऑक्टोबर २०२५ रोजी त्यांनी केलेल्या कार्यवाहीचा सविस्तर अहवाल मागविला होता.

Mhada Lottery : पुण्यात ९० लाखांचे घर फक्त २८ लाखांत मिळणार ! म्हाडाची मोठी घोषणा; अर्ज कधी आणि कसा करायचा ?

रुग्णालय प्रशासनाने अहवाल सादर न केल्याने याची गंभीर नोंद घेत आयोगाने याप्रकरणी दिनांक २९ ऑक्टोबर २०२५ रोजी आयोग कार्यालयात सुनावणी घेतली. सुनावणीस रुग्णालय प्रशासनाच्या वतीने उपस्थित व्यक्तीस तक्रार आणि त्यावर रुग्णालयाने केलेली कार्यवाही याबाबत कुठलीही माहिती नव्हती. महिला कर्मचाऱ्यांच्या तक्रारींना गांभीर्याने न घेणे आणि आयोगाने मागितलेली माहिती वेळेत न देता, सहकार्य न करणे या गंभीर मुद्द्यांची नोंद घेत आयोगाने अधिष्ठाता, सर जे जे समूह रुग्णालय यांना आयोगाने नोटीस बजावली आहे.

रुग्णालय आस्थापनेकरिता स्थापित अंतर्गत समिती (IC) कमिटीची संपूर्ण माहिती, तक्रारदार महिलेच्या तक्रारीबाबत रुग्णालय प्रशासनाने कोणती दखल घेतली आहे याबाबत सविस्तर अहवाल तसेच ज्यांच्या विरोधात तक्रार आहे त्यांना सेवानिवृत्तीनंतर पुन्हा

महत्वाच्या जबाबदा-या सोपविल्यामुळे ते पुन्हा अर्जदार डॉक्टर महिलेस मानसिक त्रास देत असल्याची बाब शासनाला अवगत केली का याचा सविस्तर खुलासा सात दिवसांच्या आत आयोगाकडे सादर करण्याचे निर्देश अधिष्ठाता, सर जे जे समूह रुग्णालय यांना देण्यात आले आहेत.