कोल्हापुर: बेकायदेशीर गर्भपात आणि गर्भलिंग निदान करणाऱ्यांमध्ये उच्चशिक्षित आणि नोकरदार वर्गाचा सहभाग प्रामुख्याने पुढे

कोल्हापूरः गर्भपात आणि गर्भलिंग निदानासाठी निवृत्त सिव्हील सर्जनकडे येणाऱ्यांमध्ये काही शिक्षक, इंजिनिअर, व्यावसायिक, शेतकरी आणि कामगार वर्ग अधिक असल्याची धक्कादायक माहिती पोलिस तपासात पुढे येत आहे. पोलिसांच्या रेकॉर्डवर २५० गर्भपात केल्याची नोंद आहे. पैकी सध्या ४० दाम्पत्यांकडे केलेल्या चौकशीत पहिल्याच यादीत या सर्वच सुशिक्षित लोकांची नावे आहेत. त्यामुळे पोलिसही चक्रावले आहेत.

कदमवाडी रोडवरील भीमनगर हाऊसिंग सोसायटीमधील प्रतिमा हॉस्पिटलमध्ये निवृत्त सिव्हील सर्जन डॉ. चंद्रकांत गायकवाड याने २५० हून अधिक गर्भपात केल्याची माहिती तपासात पुढे येत आहे. देशात एकीकडे 'बेटी बचाव, बेटी पढाओ'च्या मोठ्या वल्गना केल्या जात असताना, दुसरीकडे मात्र सुशिक्षित समाजाची विकृत मानसिकता उघडी पडत आहे. स्त्री भ्रूणहत्येच्या या 'कत्तलखान्यात' जाणाऱ्यांमध्ये अशिक्षितच नव्हे, तर समाजातील तथाकथित सुशिक्षित आणि पांढरपेशा वर्ग आघाडीवर असल्याचे निष्पन्न झाले आहे.

एजंटाना १० हजार रुपये आणि डॉक्टरला २० हजार रुपये अशा तीस हजार रुपयांत गर्भलिंग निदान आणि ५० हजारांत गर्भपात केला जायचा. वंशाला दिवाच हवा, अशी खूणगाठ बांधून आलेल्या सुशिक्षित कुटुंबियांनी मागेल तेवढी रक्कम एजंट आणि डॉक्टरांना दिली असल्याची माहिती तपासात पुढे येत आहे.

एमआयडीसीतील कामगार अधिक
डॉक्टर आणि एजंटानी दिलेल्या यादीत एमआयडीसीतील कामगारांची संख्या अधिक आहे. जिल्ह्यात विखुरलेल्या एजंटांनी या डॉक्टरांचा संबंधिताना पत्ता दिला. अन्य ठिकाणापेक्षा कमी खर्चात, विश्वासाने गर्भलिंग तपासणी केल्याचे सांगत एजंटानी या कामगारांच्याकडून पैसे उकळले.

केसपेपरच्या नोंदीच नाहीत
गर्भलिंग तपासणी आणि गर्भपाताच्या हॉस्पिटलमध्ये कोणत्याही प्रकारच्या नोंदी नाहीत. त्याचे केसपेपरही केलेले नाहीत. त्यामुळे पोलिसांनी अटकेतील डॉक्टर, एजंटानी दिलेली नावे आणि पत्त्यानुसार दाम्पत्याकडे चौकशी सुरू आहे. रेकॉर्डवर २५० आकडा आला असला तरी हा आकडा मोठा असण्याची शक्यता असल्याचे पोलिसांनी सांगितले.
वंशाच्या दिव्यासाठीच
सरकारकडून मुलगी वाचवण्यासाठी कोट्यवधी रुपयांचा निधी खर्च केला जातो. जाहिराती, प्रबोधन आणि योजनांचा सुकाळ आहे; मात्र वास्तव याच्या अगदी उलट आहे. सुशिक्षित मंडळी दिव्याच्या हव्यासापोटी पोटच्या गोळ्याची हत्या करत असल्याचे उघड होत आहे.

"डॉक्टर आणि एजंटानी दिलेल्या माहितीनुसार पहिल्या टप्प्यात ४० जण आहेत. अनेक दाम्पत्यांना बोलावून या प्रकाराची कसून चौकशी केली जात आहे. यामध्ये सर्वच सुशिक्षित मंडळी आहेत. - रवींद्र कळमकर, पोलिस निरीक्षक, करवीर
"
"शिक्षणाने डोके उजळले, पण मन आणि विचार मात्र अजूनही अंधारातच आहेत, हेच या घटनेने सिद्ध केले आहे. अशा विकृत सुशिक्षित नराधमांवर कठोर कारवाई झाली नाही, तर सरकारी 'बेटी बचाव' मोहीम केवळ कागदी घोडे नाचवण्यापुरतीच मर्यादित राहील. गीता हासूरकर, सामाजिक कार्यकर्त्या'